Samtökin Orkan okkar, sem beita sér gegn innleiðingu þriðja orkupakka Evrópusambandsins, vilja að lögreglan eða Vinnueftirlitið grípi inn í störf Alþingis með vísan til lagaákvæða sem eiga rætur að rekja til vinnutímatilskipunar Evrópusambandsins.

Hins vegar virðast samtökin misskilja gildandi lög um aðbúnað, hollustuhætti og öryggi á vinnustöðum. Skýrt kemur fram í lögunum að kafli um hvíldartíma, frídaga og hámarksvinnutíma gildi ekki um æðstu stjórnendur og þá sem ráða vinnutíma sínum sjálfir.

Orkan okkar hefur afhent lögreglunni á höfuðborgarsvæðinu og Vinnueftirlitinu kæru vegna umræðna á Alþingi um þriðja orkupakkann, sem staðið hafa fram undir morgun marga daga í röð. Þingmenn Miðflokksins hafa talað hver við annan í pontu heilu næturnar og hafa önnur störf þingsins tafist vegna málþófsins. Segja samtökin í tilkynningu á Facebook síðu sinni að 11 klukkustunda hvíldartími samkvæmt lögum sé ekki virtur.

Hvíldartíminn var lengdur í 11 klukkustundir á sólarhring árið 1997 þegar Alþingi samræmdi ákvæðið í lögum við vinnutímatilskipun Evrópusambandsins. Ísland hafði skömmu áður gerst aðili að EES-samningnum og var vinnutímatilskipunin innleidd að fullu árið 2003. Í 52. gr. laganna segir að ákvæði þess kafla gildi ekki um „æðstu stjórnendur eða aðra þá sem ráða vinnutíma sínum sjálfir“. Eiga þannig Evrópureglurnar og innleiðing þeirra í íslensk lög ekki við kjörna fulltrúa, meðal annars alþingismenn.

„Mik­il­vægt er að starfs­menn, ekki síst alþing­is­menn, geti haldið fullri ein­beit­ingu við störf sín og bíði ekki tjón á heilsu sinni,“ segir í yfirlýsingu frá samtökunum. „Þá er einnig að því að hyggja að aðilar sem hags­muna eiga að gæta og al­menn­ing­ur hafi tök á að fylgj­ast með umræðunni í raun­tíma.“

Yfirlýsing Orkunnar okkar í heild

„Nú hag­ar svo til að nefnda- og þing­fund­ir á Alþingi hafa staðið yfir nán­ast sam­fellt sól­ar­hring­um sam­an. Fundað er á víxl í nefnd­um og í þing­inu, hvíld­ar­laust. Störf Alþing­is eru um þess­ar mund­ir í and­stöðu við Lög um aðbúnað, holl­ustu­hætti og ör­yggi á vinnu­stöðum, einkum IX kafla lag­anna um hvíld­ar­tíma, frí­daga og há­marks­vinnu­tíma. Lög­boðinn 11 klst. hvíld­ar­tími er óra­fjarri því að vera virt­ur.

Lög þessi eru vita­skuld ekki sett að til­efn­is­lausu. Mik­il­vægt er að starfs­menn, ekki síst alþing­is­menn, geti haldið fullri ein­beit­ingu við störf sín og bíði ekki tjón á heilsu sinni. Þá er einnig að því að hyggja að aðilar sem hags­muna eiga að gæta og al­menn­ing­ur hafi tök á að fylgj­ast með umræðunni í raun­tíma.“