Jón Baldvin Hannibalsson, fyrrverandi ráðherra og sendiherra, gaf skýrslu hjá lögreglunni á höfuðborgarsvæðinu í gær, samkvæmt heimildum Stundarinnar. Carmen Jóhannsdóttir hefur kært hann fyrir kynferðislega áreitni.

Jón Baldvin neitaði að svara spurningum Stundarinnar um málið þegar blaðamaður hafði samband við hann í gær.

Sjö konur hafa stigið fram undir nafni og sakað Jón Baldvin um kynferðislegra áreitni. Alls hafa 23 konur birt sögur sínar á vefsíðu og halda frásagnir áfram að berast í sérstökum MeToo hópi kvennanna á Facebook. Jón Baldvin hefur ítrekað sagt að sögurnar eigi allar rætur að rekja til veikinda dóttur sinnar.

Nýjasta tilfellið varðar atvik þegar Carmen, 34 ára, og móðir hennar, vinkona Jóns Baldvins og Bryndísar Schram, voru staddar í veislu á þaki heimilis hjónanna í Andalúsíu á Spáni. Þær segja að Jón Baldvin hafi káfað á rassi Carmenar. „Ég horfði á þetta gerast,“ sagði móðir hennar í samtali við Stundina.

Jón Baldvin afskrifaði hins vegar atvikið í viðtali í Silfrinu á RÚV á þeim forsendum að hann hafi það vottfest frá Hugrúnu Jónsdóttur, sem einnig var viðstödd, að hún hefði ekki orðið vör við snertinguna. „Veislan á þakinu var sviðsett. Hún er ósönn. Ég meina það, að það getur ekki verið neitt annað að baki þessari heimsókn en að setja þetta á svið.“ Aðspurður hvers vegna móðirin ætti að koma í heimsókn til að „siga dóttur sinni“ á hann: „Það er ekki mitt að skýra það.“ Hann kvaðst einnig vera með bók um málið í undirbúningi.