Davíð Oddsson, ritstjóri Morgunblaðsins og einn áhrifamesti stjórnmálamaður Íslands á síðustu áratugum, er látinn, 78 ára að aldri. Hann lést á heimili sínu í gær. Greint var frá andlátinu í Morgunblaðinu.
Davíð fæddist í Reykjavík 17. janúar 1948 og hóf stjórnmálaferil sinn snemma. Hann var kjörinn í borgarstjórn Reykjavíkur árið 1974 og gegndi embætti borgarstjóra frá 1982 til 1991. Síðan var hann formaður Sjálfstæðisflokksins, kjörinn á þing og varð forsætisráðherra 1991, embætti sem hann gegndi til 2004. Eftir það var hann utanríkisráðherra í eitt ár.
Sem bæði borgarstjóri og forsætisráðherra stóð Davíð fyrir umtalsverðum breytingum á íslensku samfélagi með einkavæðingu ríkisfyrirtækja og breytingum á umhverfi fyrirtækja í anda frjálshyggju Margretar Thatcher.
Árið 2005 var Davíð skipaður seðlabankastjóri og gegndi þeirri stöðu til 2009, í gegnum allsherjar fjármálahrun. Var hann nefndur á lista bandaríska Time tímaritsins sem einn 25 einstaklinga sem mesta ábyrgð báru á fjármálahruninu.
Úr Seðlabankanum lá leið hans í ritstjórastól Morgunblaðsins, þar sem hann starfaði fram á síðustu daga.
Davíð Oddsson var bæði dáður og umdeildur; hann átti stóran þátt í að móta íslenska stjórnmála- og efnahagsumhverfið á seinni hluta 20. aldar og byrjun 21. aldar.
Eftirlifandi eiginkona hans er Ástríður Thorarensen. Davíð lætur einnig eftir sig son, tengdadóttur og tvö barnabörn.
Hann tók sem borgarstjóri við afargóðu búi eftir að vinstri borgarstjórnarmeirihlutinn 1978-1982 ákvað að stækka þjónustusvæði hitaveitunnar verulega. Auðvitað voru himinháar skuldir vegna framkvæmda við stækkunina í Kópavog og áfram í Garðabæ og Hafnarfjörð. Þetta hafði SJálfstæðisflokknum ekki dottið áður í hug. Og þegar notendum hitaveitunnar fjölgaði þá urðu allt í einu gríðarlegar tekjur af henni, skuldirnar hurfu og unnt var að endurnýja Viðeyjarstofu, ráðast i byggingu raðhússins og Perlunnar. Því miður verður að minnast Davíðs fyrir að hafa tekið stundum kolrangar ákvarðanir eins og niðurskurð á þjónustu SVR sem olli því að margir fengu sér bíl til að komast í og úr vinnu. Og ekki má gleyma því þegar átti að leggja hraðbraut eftir Fossvoginum endilöngum. Því var forðað af bæjarstjóranum í Kópavogi. Margt fleira mætti tína til en auðvitað prýddi DO marga góða kosti sem ber að halda til haga.
Fjölskyldu, sem og vinum og vandamönnum er óskað innilegustu samúðarkveðjur.
Öðru vísi mér áður brá
ekkert vekur íhalds kæti.
Nú er Davíð fallinn frá
og flokkurinn í þriðja sæti.