Þriðjungur þjóðarinnar er mjög andvígur innheimtu veggjalda og tæpur fjórðungur er frekar andvígur. Þetta kemur fram í nýrri könnun MMR um málið. Litlar breytingar eru á afstöðu fólks frá því í síðustu sambærilegu könnun fyrirtækisins sem gerð var í maí á síðasta ári.
Rúmlega helmingur landsmanna er því andvígur upptöku veggjalda samkvæmt könnuninni. Þar af eru 34 prósent mjög andvíg og 18 prósent frekar andvíg. Samsvarandi tölur í maí í fyrra voru 31 og 19 prósent. Á móti kemur að tæplega þriðjungur landsmanna eru hlynnt innheimtu veggjalda. Þar af eru 11 prósent mjög fylgjandi og 21 prósent frekar fylgjandi. Sambærilegar tölur frá því í fyrra voru 8 prósent og 24 prósent. Þeir sem voru hvorki fylgjandi né andvígir mældust vera 17 prósent, tveimur prósentustigum færri en í maí 2018.
Almennt voru konur nokkru jákvæðari en karlar gegn því að veggjöld yrðu tekin upp. Fjórðungur kvenna var frekar fylgjandi upptöku veggjalda og átta prósent mjög fylgjandi. Afstaða karla var hins vegar sú að 16 prósent þeirra voru frekar fylgjandi upptöku veggjalda og 13 prósent mjög fylgjandi.
Þá jókst stuðningur við innheimtu veggjalda eftir aldri þáttakenda en 43 prósent þeirra sem í elsta aldurshópnum eru, 68 ára og eldri, voru fylgjandi upptöku þeirra. Ekki nema 26 prósent aðspurðra í yngsta aldurshópnum, 18 til 29 ára, var fylgjandi innheimtu veggjalda.
Mestur stuðningur við upptöku veggjalda er hjá kjósendum Sjálfstæðisflokksins, þar sem 49 prósent sögðust styðja innheimtu veggjalda, hjá Vinstri grænum og Viðreisn en 44 prósent stuðningsfólks beggja flokka sagðist fylgjandi upptöku gjaldanna. Stuðningsfólk Miðflokksins var harðast í andstöðu gegn innheimtu veggjalda en 73 prósent þess sagðist andvígt. Samsvarandi tölur fyrir kjósendur Miðflokksins reyndust 61 prósent.
Athugasemdir