Karl Gauti Hjaltason og Ólafur Ísleifsson, þingmennirnir sem voru reknir úr Flokki fólksins vegna Klaustursmálsins, lýstu áhyggjum af fjármálum flokksins hjá ríkisendurskoðanda síðasta haust. Gagnrýna þeir formann flokksins, Ingu Sæland, fyrir að fara sjálf með fjármálin.

Þetta kemur fram í Morgunblaðinu í dag. Segja þingmennirnir að ekki sé forsvaranlegt að formaður stjórnmálaflokks fari með fjármál eigin flokks. Óeðlilegt hafi einnig verið þegar Inga var gjaldkeri flokksins, samhliða formennsku, og með prókúru.

„Ég lét uppi við formanninn það sjónarmið að ég teldi ekki rétt að fjármál flokksins væru í höndum kjörinna fulltrúa,“ segir Ólafur Ísleifsson. „Þetta gerðum við strax báðir snemma í nóvember árið 2017 á þingflokksfundi, skömmu eftir að við vorum kjörin á þing.“

Þá segir Ólafur þá félaga hafa gert athugasemdir við ráðningu sonar Ingu sem starfsmanns á skrifstofu flokksins. „Eftirlit með fjárreiðum stjórnmálaflokka er á hendi Ríkisendurskoðunar,“ segir Ólafur. „Skömmu eftir að nýr maður tók þar við embætti árið 2018 greindum við honum frá þessum staðreyndum og lýstum áhyggjum okkar.“

Inga er nú hætt sem gjaldkeri flokksins og segist í samtali við Morgunblaðið hafa setið hjá þegar greidd voru atkvæði um að ráða son hennar sem starfsmann. „Þetta virk­ar á mig sem sær­indi og hefnd­argirni,“ seg­ir Inga. „Málið er það að þeir voru aldrei sátt­ir við það hvað ég sat á hverri krónu eins og orm­ur á gulli“