Það er frá­leitt að halda því fram að þing­menn sem fengu meira en 30 þús­und kíló­metra akst­urs­kostnað end­ur­greiddan frá Alþingi í fyrra hafi gerst brot­legir við siða­reglur. Þetta segir Helgi Bern­ód­us­son, skrif­stofu­stjóri Alþingis í svari við fyr­ir­spurn Stund­ar­innar um málið. 

Í 6. gr. reglna um þing­far­ar­kostnað sem tóku gildi síðla árs 2016 segir: Þegar alþing­is­maður þarf að aka meira en 15.000 km á ári í starfi sínu skal hann fá til afnota bíla­leigu­bif­reið sem skrif­stofa Alþingis leggur til. 

Samkvæmt siða­reglum þing­manna ber þeim að sjá til þess að end­ur­greiðsla fyrir útgjöld þeirra sé í full­komnu sam­ræmi við reglur sem settar eru um slík mál, þ.e. reglur um þing­far­ar­kostnað.

Ásmundur Frið­riks­son, Vil­hjálmur Árnason og fleiri þing­menn keyrðu hins vegar um tvö­falt lengri vega­lengdir á eigin bif­reiðum í fyrra og fengu kostn­að­inn end­ur­greiddan.

Helgi Bern­ód­us­son og for­sætis­nefnd telja að líta verði til þess að þá hafi enn hafi verið í gangi inn­leið­ing á reglum um bíla­leigu­bíla, reglum sem voru settar árið 2016.

Inn­leið­ing­unni hafi ekki lokið fyrr en í febr­úar 2018 og þing­menn hafi á þessu tíma­bili átt í sam­skiptum við þing­skrif­stof­una um fram­kvæmd regln­anna.

Helgi Bern­ód­us­son segir að eftir því sem skrif­stofu Alþingis sé kunn­ugt um hafi eng­inn þing­maður gert til­raun til að fá end­ur­greiðslu fyrir akstur sem hann átti ekki rétt á sam­kvæmt lögum og reglum, enda hefði slíkt aldrei við­geng­ist athuga­semda­laust. 

Hann bendir á að alls kyns spurn­ingar hafi vaknað um fram­kvæmd reglna um notkun bíla­leigu­bíla, svo sem hvað varðar trygg­ingar, einka­not, teg­undir bíla, notk­un­ar­tíma og elds­neytis­kaup. Jafn­framt hafi þótt rétt að miða breyttar reglur við þing­kosn­ingar og því hafi verið unnið að setn­ingu vinnu­reglna eftir kosn­ing­arnar 2017 þar sem úr vafa­at­riðum væri skorið.

„Allir reikn­ingar þeirra voru greiddir, skv. ákvörðun skrif­stof­unnar og eftir yfir­ferð hennar, meðan hið nýja fyr­ir­komu­lag var að kom­ast á. Í því fólust engin brot á siða­reglum“

„Það er alveg frá­leitt að þeir þing­menn, og þeir voru þó nokkrir, sem héldu áfram akstri á eigin bílum eftir kosn­ing­arnar 2017, hvort sem var í heim­an­akstri eða til­fallandi akstri, hafi með því brotið siða­reglur. Allir reikn­ingar þeirra voru greiddir, skv. ákvörðun skrif­stof­unnar og eftir yfir­ferð hennar, meðan hið nýja fyr­ir­komu­lag var að kom­ast á. Í því fólust engin brot á siða­reglum, enda stóðu yfir sam­töl og sam­skipti milli við­kom­andi þing­manna og skrif­stof­unnar á þessum tíma. Um þetta má lesa í grein­ar­gerð þeirri sem skrif­stofan tók saman í lok febr­úar á þessu ári að beiðni for­sætis­nefndar og lesa má á vef Alþingi.“

Helgi bendir á að í meg­in­reglum Alþingis um þing­far­ar­kostnað segi að jafnan skuli leita hag­kvæm­ustu leiða í ferða­kostn­aði, bæði innan lands og utan. Alþing­is­menn eigi lög­bund­inn rétt á að þeim sé end­ur­greiddur ferða­kostn­aður „í tengslum við störf“ þeirra. „Innan þess ramma er unnið,“ segir Helgi.