Í byrjun októ­ber­mán­aðar vant­aði enn starfs­fólk í ríf­lega 55 stöðu­gildi við leik­skóla Reykja­vík­ur­borgar. Á sama tíma voru 139 börn, sextán mán­aða og eldri, á biðlista eftir leik­skóla­plássi. Enn bíða um 300 börn eftir vist á frí­stunda­heim­ili þar eð enn hefur ekki tek­ist að ráða 79 starfs­menn stil starfa. Staða mönn­un­ar­mála í grunn­skólum borg­ar­innar versn­aði þá frá fyrri mán­uði. Tölurnar sem um ræðir eru fengnar dag­ana 3. til 5. októ­ber.

Þettta kemur fram í tölum sem Stundin óskaði eftir frá Reykja­vík­ur­borg. Lítið hefur þok­ast í ráðn­ing­ar­málum leik­skól­anna milli mán­aða, 13. sept­em­ber síð­ast­lið­inn vant­aði starfs­fólk í rúm­lega 62 stöðu­gildi og því hefur aðeins tek­ist að manna 7 stöðu­gildi milli mán­aða. Staðan er mis­mun­andi eftir borg­ar­hverfum, verst er hún í Mið­borg­inni, Hlíðum og Vesturbæ en þar á eftir að ráða í 23,5 stöðu­gildi. Í þeim hverfum bíða 36 börn eftir leik­skóla­vist. Athygli vekur að þó ekki vanti starfs­fólk í nema 12,5 stöðu­gildi í Laug­ar­dal og Háaleiti bíða engu að síður 39 börn eftir að fá pláss á leik­skóla þar. Búið er að ráða í tæp 98 pró­sent stöðu­gilda.

Staðan versnar í grunnskólunum

Þá á eftir að ráða í rúm 20 stöðu­gildi í grunn­skólum borg­ar­innar, þar af 8 kenn­ara­stöður og stöður 8 stuðn­ings­full­trúa. Staðan þar hefur versnað milli mán­aða en 17. sept­em­ber síð­ast­lið­inn vant­aði starfs­fólk í 16,5 stöðu­gildi í grunn­skól­unum. Staðan þar hefur því versnað um tæp fjögur stöðu­gildi frá fyrri mán­uði. Engu að síður eru 99 pró­sent stöðu­gilda grunn­skól­anna mönnuð.

Á biðlista eftir vist á frí­stunda­heim­ili eru nú 293 börn, borið saman við 532 börn á biðlista 12. sept­em­ber síð­ast­lið­inn. Enn á eftir að ráða í tæp 39 stöðu­gildi, alls 79 starfs­menn. Það þýðir að enn á eftir að manna 11 pró­sent allra stöðu­gilda á frí­stunda­heim­ilum.