Hildur Björnsdóttir og Katrín Atladóttir, borgarfulltrúar Sjálfstæðisflokks, sátu hjá við atkvæðagreiðslu um Borgarlínu og lögðust ekki gegn málinu eins og samflokksmenn þeirra. Fulltrúi Sósíalistaflokksins vildi vísa málinu frá og kaus loks gegn því. .

Tillagan var lögð fram og samþykkt af meirihluta Samfylkingar, Vinstri grænna, Viðreisnar og Pírata og fól í sér að fela umhverfis- og skipulagsráði ákveðin verkefni við undirbúning Borgarlínu, verkefnis sem snýst um uppbyggingu almenningssamgangna á höfuðborgarsvæðinu.

Hildur og Katrín, tvær af átta fulltrúum Sjálfstæðisflokksins, sátu hjá en Hildur hafði í viðtölum fyrir kosningar lýst sig jákvæða gagnvart Borgarlínu. Í viðtali við Vísi sagði Hildur ekkert því til fyrirstöðu að Reykjavík vinni Borgarlínu í samvinnu við nágrannasveitarfélögin. Var það nokkuð á skjön við málflutning Eyþórs Arnalds, oddvita Sjálfstæðisflokksins.

Við atkvæðagreiðsluna las Eyþór upp bókun í nafni allra fulltrúa flokksins. „Ekki er með neinu móti hægt að samþykkja þessa tillögu, enda er hún upphaf að óvissuferð,“ sagði Eyþór. „Auk þess er tillagan í mótsögn við annað sem hefur verið samþykkt hingað til. Ekki liggur fyrir hver á að standa að uppbyggingu og rekstri Borgarlínu, en áður hefur verið talað um samstarfsverkefni sveitarfélaganna. Þá liggur ekki fyrir kostnaðarmat, en ljóst er að tillagan kostar hundruð milljóna króna, þó ekkert verði framkvæmt.“

Fulltrúi Sósíalista kaus gegn Borgarlínu

Sanna Magdalena Mörtudóttir, borgarfulltrúi Sósíalistaflokksins, sagði tillöguna ekki nógu vel unna, þar sem fólk sem notar almenningssamgöngur hafi ekki komið að skipulagningunni á öllum stigum uppbyggingar. „Um það er ekki nógu skýrt kveðið í tillögunni,“ sagði Sanna. „Því er lagt til að tillögunni verði vísað frá og hún unnin í samvinnu við almenning, sem stólar á almenningssamgöngum.“

Lagði Sanna fram frávísundartillögu sem var felld. Kaus hún á endanum gegn tillögunni um Borgarlínu. Það gerðu einnig Kolbrún Baldursdóttir, fulltrúi Flokks fólksins, og Vigdís Hauksdóttir úr Miðflokknum.