„Persónulegar ástæður“ eru sagðar vera fyrir því að Orka náttúrunnar skiptir um framkvæmdastjóra í annað skiptið á fjórum dögum.
Tilkynnt var með fréttatilkynningu skömmu fyrir hádegi að Þórður Ásmundsson myndi láta af starfi tímabundsins framkvæmdastjóra, sem hann hafði verið ráðinn til á föstudag. Hans í stað hefði Berglind Rán Ólafsdóttir verið ráðin í stöðuna.
Þórður var ráðinn tímabundinn framkvæmdastjóri Orku náttúrunnar eftir að Bjarni Már Júlíusson var látinn víkja vegna framkomu hans í garð starfsfólks. Komið hefur fram að hann sendi meðal annars tölvupóst á samstarfskonur sínar um að hjólreiðar bættu kynlífið, en einnig hefur fyrrverandi starfsmaður, Áslaug Thelma Einarsdóttir, greint frá fleiri tilfellum. Hún rekur uppsögn sína síðasta mánudag til umkvartana sinna vegna framgöngu framkvæmdastjórans.
„Persónulegar ástæður er það að það tengist ekki vinnustaðnum.“
Eiríkur Hjálmarsson, upplýsingafulltrúi Orkuveitunnar, segist í samtali við Stundina geta „ekkert um það sagt“ hvers vegna Þórður hættir nú, svona stuttu eftir að hann var ráðinn. „Það voru persónulegar ástæður þar að baki,“ svarar Eiríkur. „Það er það sem ég get sagt.“
Nánar spurður segir Eiríkur að ástæðan tengist ekki vinnustaðnum. „Persónulegar ástæður er það að það tengist ekki vinnustaðnum. Það er voðalega erfitt, nákvæmlega eins og í öðrum starfsmannamálum, að ræða persónuleg málefni starfsmanna.“
Spurður hvort ákvörðunin hafi verið að frumkvæði Orkuveitunnar eða Þórðar sjálfs segir Eiríkur: „Ég veit það ekki.“
Athugasemdir