Mynd af Sigríði Andersen dómsmálaráðherra að taka í höndina á Herbert Kickl, innanríkisráðherra Austurríkis, var birt á vef ráðuneytis hennar í dag. Sigríður og Kickl hittust á fundi Schengen ríkja í síðustu viku þar sem rætt var um harðari landamærastefnu. Kickl var ræðuhöfundur Jörg Haider, leiðtoga Frelsisflokksins (FPÖ), og hefur verið kallaður „hinn austurríski Joseph Goebbels“.
Frelsisflokkurinn er hægriöfgaflokkur sem elur á útlendingaandúð og situr nú í ríkisstjórn Austurríkis ásamt Kristilega íhaldsflokknum (ÖVP). Flokkurinn var stofnaður af fyrrverandi nasistum eftir seinni heimsstyrjöld og hefur á undanförnum árum komist til áhrifa í krafti harðrar stefnu gegn flóttamönnum.
Í janúar vakti Kickl athygli á alþjóðavísu með því að nota orðið „einangra“ um hælisleitendur, sem margir tengdu við stefnu nasista í Seinni heimsstyrjöld. Sagði hann að koma þyrfti upp aðstöðu fyrir stjórnvöld til að „einangra hælisleitendur á einum stað“. Var Kickl harðlega gagrýndur af stjórnmálamönnum fyrir ummælin.
Nasistar ráku einangrunarbúðir í Austurríki frá 1938 til 1945 í Mauthausen-Gusen, þar sem hundruð þúsunda voru drepin. Talið er að helför nasista hafi í heild sinni kostað yfir 15 milljón manns lífið, þar af 6 milljónir gyðinga.
Harðari útlendingastefna í ráðherratíð Sigríðar
Sigríður Andersen hefur í tíð sinni sem dómsmálaráðherra hert á stefnu Íslands í útlendingamálum. Með lögum sem sett voru þann 6. apríl 2017 voru tilteknir hópar hælisleitenda sviptir réttinum til að fá réttaráhrifum ákvörðunar Útlendingastofnunar um brottvísun frestað vegna kæru til æðra stjórnvalds eða dómstóla. Rauði krossinn á Íslandi og Lögmannafélagið vöruðu við lagabreytingunum og töldu að með þeim væri réttaröryggi hælisleitenda skert og mannréttindum þeirra ógnað en gagnrýnin var hunsuð og málið keyrt í gegn.
Í lok ágúst setti svo Sigríður reglugerð um að útlendingar yrðu sviptir réttinum til framfærslufjár eftir að hælisumsóknum þeirra væri synjað og meðan þeir biðu eftir að vera sendir úr landi. Í reglugerðinni felst líka að ef hælisleitandi er frá ríki sem er á lista yfir örugg upprunaríki og umsókn er metin „bersýnilega tilhæfulaus“ getur Útlendingastofnun fellt niður alla þjónustu við viðkomandi eftir að framkvæmdarhæf ákvörðun um synjun umsóknar liggur fyrir.
Þá hefur Sigríður sagt að að „tilhæfulausar umsóknir“ hælisleitenda séu að „kæfa kerfið“ og lýsti því yfir í tíð ríkisstjórnar Sjálfstæðisflokks, Bjartrar framtíðar og Viðreisnar að ríkisstjórnin ætlaði „ekki að láta það átölulaust ef menn [hælisleitendur] ætla að misnota þá velvild sem við viljum sýna“.
Styrking ytri landamæra Schengen rædd
Sigríður og Kickl hittust á fundi Schengen ríkja í Innsbruck í Austurríki, fimmtudaginn 12. júlí. Til umræðu á fundinum var „styrking ytri landamæra Schengen-svæðisins og aukið öryggi innan Evrópu með tilliti til heildarstefnu ríkjanna í útlendingamálum.“
Þá var efling Landamærastofnunar Evrópu (Frontex) til umræðu. „Sigríður Á. Andersen dómsmálaráðherra vakti athygli á því að hraður vöxtur Frontex sem kallar á aukið framlag aðildarríkja í formi mannauðs og tækja mætti ekki verða á kostnað getu aðildarríkjanna til að standa að viðunandi landamæravörslu á heimavelli með tilliti til fjölgunar ferðamanna og umsækjenda um alþjóðlega vernd,“ segir í tilkynningunni.
Í tilkynningunni kemur fram að ráðherrar aðildarríkjanna hafi lagt mikla áherslu á að efla þurfi samskipti Evrópuríkja við þriðju ríki vegna endursendinga einstaklinga sem hljóta ekki alþjóðlega vernd í Evrópu. Þá var lögreglusamvinna í Evrópu einnig rædd, til dæmis hvað varðar baráttuna gegn mansali og smygl á einstaklingum.
Athugasemdir