Í samtali við fréttastofu TV 2 í Danmörku segir Pia Kjærsgaard, forseti danska þingsins og fyrrverandi formaður Danska þjóðarflokksins, ummæli þingmanna á borð við Helgu Völu Helgadóttur, þingmanns Samfylkingarinnar, vera fáránleg og til skammar. Hún segir Pírata jafnframt vera illa upp alda.
Pia er einnig til viðtals á danska fjölmiðlinum Politiken. Þar segir hún Pírata vera flokk sem skipti engu máli en hún hafi orðið fyrir vonbrigðum með íslenska sósíaldemókrata.
TV 2 og aðrir danskir fjölmiðlar hafa vakið athygli á mótmælum íslenskra þingmanna við ávarpi og veru Piu á hátíðarfundi Alþingis á Þingvöllum.
Þegar greint var frá því að Pia myndi halda hátíðarræðu á fundinum brást almenningur og hluti þingmanna harkalega við. Þannig ákvað þingflokkur Pírata að sniðganga fundinn, Helga Vala Helgadóttir, þingkona Samfylkingarinnar, gekk af þingpallinum er Pia steig í pontu og margir þingmenn úr mismunandi stjórnmálaflokkum sýndu óánægju sína í verki með því að bera límmiða til höfuðs rasisma. Á miðunum var áletrað „Nej til racisme“ eða “Nei við kynþáttahyggju“.
„Það hljóta að vera kynþroskavandamál hjá Pírötum og íslenskir sósíaldemókratar geta augljóslega ekki staðið í eigin fætur,“ segir Pia við Politiken. Hún segist jafnframt aldrei í starfi sínu hafa sem þingforseti Danmerkur mætt sniðgöngu frá lýðræðiskjörnum fulltrúum.
Pia segist ekki hafa tekið eftir mótmælum alþingismannanna í samtali við TV 2. „Það er rétt að Píratar vildu ekki taka þátt í fundinum, en ég get ekkert gert í því að þeir sem eru illa upp aldir og skilja ekki að þegar maður býður forseta danska þingsins en ekki mér persónulega, að þá felst í því engin niðurlæging gagnvart mér.
„Það voru engin vandræði þegar ég hélt ræðuna. Þá ríkti góð ró og regla. Það var góð stemning. Þá fann ég ekki fyrir neinum mótmælum þegar ég kom né neinu þegar ég fór. Það hefur eitthvað farið fram á samfélagsmiðlum án þess að ég hafi orðið vör við það,“ segir Pia.
Helga Vala var einnig til samtals á TV 2. Þar sagði hún að mótmælunum hefði ekki verið beint að danska þinginu, þjóðinni eða stjórnvöldum þar, heldur Piu sérstaklega, og stefnu henni og skoðunum í málefnum innflytjenda.
„Að mínu mati, breytir núverandi staða hennar engu um hvað hún hefur sagt eða gert gagnvart hópi fólks sem ekki getur varið sig,“ segir Helga jafnframt.
Pia segir þennan málflutning Helgu vera fáránlegan. „Þau hafa það auðvelt hér á Íslandi, en þau eru augljóslega algerlega ómeðvituð um hvað er að eiga sér stað í heiminum og hvernig þeirra flokkur hagar sér í Danmörku [innskot blaðamanns: hér vísar Pia líklega til Sósíaldemókrataflokksins í Danmörku] . Málflutningur þeirra er fáránlegur og til skammar. Ekki gagnvart mér persónulega heldur gagnvart Danmörku,“ segir Pia.
Athugasemdir