Engar nýjar upp­lýs­ingar hafa komið fram sem varpað geta ljósi á mál Hauks Hilm­ars­sonar, sem saknað hefur verið í Sýrlandi frá því í lok febr­úar. Þetta kemur fram í svari við fyr­ir­spurn Stund­ar­innar til utan­rík­is­ráðu­neyt­is­ins.

Enn fremur kemur fram í svar­inu að máli Hauks hafi síð­ast­liðnar vikur verið fylgt eftir við stjórn­völd og aðra aðila í þeim ríkjum sem boð­ist hafi til að aðstoða við upp­lýs­inga­öflun og almennt hvað varðar hvarf Hauks, en án án árang­urs. Eft­ir­grennslan verði haldið áfram og komi fram nýjar upp­lýs­ingar verði þeim fylgt eftir.

Fregnir bár­ust af því að Hauks væri saknað í byrjun mars þegar frétta­miðlar í Tyrk­landi birtu fréttir þar um. Þar var Haukur sagður hafa látið lífið í árás tyrk­neska hers­ins í Afrin-hér­aði í norð­ur­hluta Sýrlands.

Ekki hefur verið stað­fest hvort Haukur sé lífs eða lið­inn, og í raun hafa stjórn­völd vart kom­ist yfir neinar upp­lýs­ingar um afdrif hans. Þá hefur ekki tek­ist að fá upp­lýs­ingar um hvaðan heim­ildir fyrir þeirri stað­hæf­ingu að Haukur hefði fallið, sem tyrk­neskir fjöl­miðlar full­yrtu í upp­hafi, væru upp­runnar.

Haukur mun hafa barist með her­sveitum Kúrda í Sýrlandi gegn hryðju­verka­sam­tök­unum ISIS og tók þátt í að frelsa sýr­lensku borg­ina Raqqa undan ógn­ar­stjórn þeirra. Þegar tyrk­neski her­inn réðst yfir landa­mæri Sýrlands og til atlögu við Kúrda í Afrin-hér­aði sneri Haukur ásamt öðrum her­mönnum Kúrda til baka til varnar hér­að­inu og Afr­in­borg. Eftir bar­daga 24. febr­úar síð­ast­lið­inn hefur hins vegar ekk­ert spurst til Hauks.