Inga Sæland, formaður Flokks fólksins, segir dapurlegt en um leið skiljanlegt að kjósendur séu tortryggnir í sinn garð og flokksins. Hún minnir á að flokkurinn sé í stjórnarandstöðu og því fái þeirra baráttumál og vilji ekki brautargengi hjá ríkisstjórninni. Jafnframt kvartar hún yfir því að kjósendur hvetji ekki flokkinn til dáða fremur en að láta ítrekað að því liggja að þingmenn flokksins séu ekkert annað en „hugsjónalausar afætur sem gleymum tilgangi okkar þegar markmiðinu var náð að komast á þing.“
Inga skrifaði færslu á Facebook-síðu sína með þessu inntaki nú í morgun. Rótin að skrifum Ingu eru fyrirspurnir sem hún fékk á síðunni þar sem hún var meðal annars þinguð um hvort hún hefði lagt fram fyrirspurnir um hvort ríkisstjórnin hyggðist afnema skerðingar á eftirlaunagreiðslum vegna tekna og eins hvort hún eða Flokkur fólksins hefði lagt fram frumvarf til laga um hækkun persónuafsláttar þeirra sem væru með tekjur undir framfærsluviðmiði. „Ef ekki, hvert er þá eiginlega hlutverk [FF]?“ var þar spurt.
Gera meira en að leggja fram fyrirspurnir
Inga segir hins vegar að þingmenn flokksins hafi gert miklu meira en að leggja bara fram fyrirspurnir. Þau hafi lagt fram frumvörp. „Vonandi áttið þið ykkur þó á því að við erum í stjornarandstöðu enn sem komið er þannig að það er ekki okkar vilji sem fær brautargengi hjá ríkisstjórninni.“
Inga segir að Flokkur fólksins vonist eftir að á næstunni verði afgreidd út úr nefndum Alþingis tvo mál sem flokksmenn hafa lagt fram, annars vegar um afnám skerðinga vegna launatekna aldraðra og hins vegar um afnám skerðinga vegna styrkveitinga til kaup á hjálpartækjum fyrir aldraða og öryrkja. „Þessir styrkir eru skattlagðir í botn sem hreinar tekjur og skerða auk þess almanatryggingar til öryrkja krónu á móti krónu. Við erum að vona að þetta réttlætismál sé þess eðlis að jafnvel kaldlyndustu stjórnmálamenn geti ekki annað en séð það og samþykkt.“
Inga segir síðan að öll mál flokksins séu lögð fram fyrir örykja, aldraða og þá sem búa við fátækt. „Ég vildi óska þess að þið hvettuð okkur frekar til dáða en að láta ítrekað líta út fyrir að við séum ekkert annað en hugsjónalausar afætur sem gleymum tilgangi okkar þegar markmiðinu var náð að komast á þing.“
„Okkur vantar aflið“
Í samtali við Stundina segir Inga að henni þyki þessi gagnrýni ekki ósanngjörn þrátt fyrir allt. „Nei, hún er það ekki. Það er nefnilega þannig að það er ekki ósanngjarnt að sitja undir gagnrýni þegar fólk er að brasa við það hver einustu mánaðarmót að hafa í sig og á og þegar stjórnvöld sem kosin voru til að hjálpa fólki eru ekki að gera það. Auðvitað sitjum við þá öll 63 undir gagnrýninni, þingmenn. Fólk vill hins vegar kannski ekki alveg horfa á staðreyndirnar í stjórnmálunum, þá staðreynd að við erum bara fjögur og við erum í stjórnarandstöðu. Við í Flokki fólksins getum ekki lagað þetta þó ég sé með grátstafinn í kverkunum. Okkur vantar aflið til þess. Það breytir þó ekki þeirri staðreynd að við erum komin að ræðupúltinu, við erum að gera hvað við getum.“
Athugasemdir