Seðlabankinn mun herða á peningalegu aðhaldi ef slökun á aðhaldi ríkisfjármála verður meiri á næsta ári en áður var gert ráð fyrir. Þetta kemur fram í yfirlýsingu peningastefnunefndar vegna vaxtaákvörðunar í dag. Vöxtum er haldið óbreyttum, en horfur eru á að spenna í þjóðarbúskapnum verði áfram umtalsverð.

„Það er spenna ennþá, þess vegna þurfum við aðhald. Ef það slaknar á aðhaldi í ríkisfjármálum á næsta ári miðað við það sem við erum með inni í okkar forsendum í nóvember þá er augljóst að það þýðir að peningastefnan verður eitthvað aðhaldssamari en ella,“ sagði Már Guðmundsson seðlabankastjóri þegar peningastefnunefndin gerði grein fyrir ákvörðun sinni núna á ellefta tímanum.

Fjárlagafrumvarp nýrrar ríkisstjórnar verður lagt fram á morgun. Boðuð hefur verið umtalsverð útgjaldaaukning til heilbrigðis-, mennta- og samgöngumála en jafnframt tveggja prósentustiga hækkun á fjármagnstekjuskatti. Kolefnisgjald verður hækkað helmingi minna en áður stóð til, auk þess sem frítekjumark vegna atvinnutekna eldri borgara verður hækkað upp í 100 þúsund krónur á mánuði. Fjárlagafrumvarp fyrri ríkisstjórnar gerði ráð fyrir 44 milljarða tekjuafgangi á næsta ári, en gengið verður talsvert á afganginn til að standa undir auknum útgjöldum til ýmissa málefnasviða.

Mynd: Wikimedia / Zinneke (CC license)

Þingmenn stjórnarandstöðunnar fá kynningu á meginatriðum fjárlagafrumvarpsins kl. 16 í dag og fyrsta umræða um það hefst á föstudaginn. 

Björn Leví Gunnarsson, þingmaður Pírata, hefur óskað eftir því að þingmenn fái í hendur stafræna útgáfu af frumvarpinu í trúnaði í dag og þannig aukið ráðrúm til undirbúnings. Hann greinir frá því á Facebook að Steingrímur J. Sigfússon, forseti Alþingis, hafi hvatt ríkisstjórnina til að verða við því. Aðspurður segist Björn engin svör hafa fengið frá fjármálaráðuneytinu, en telja eðlilegt að þingmenn fái frumvarpið fyrirfram í ljósi fyrirheita sem gefin hafa verið um aukið samstarf og samráð við Alþingi og eflingu þess.

Í fyrra var fjárlagafrumvarp lagt fram þann 6. desember og samþykkt 22. sama mánaðar. Þá líkt og nú voru uppi óvenjulegar aðstæður vegna stjórnarslita og Alþingiskoninga að hausti. Nú er fjárlagafrumvarpið lagt fram enn seinna, en á móti kemur að gert er ráð fyrir að þingið starfi milli jóla og nýárs. Stundin mun fjalla ítarlega um frumvarpið á morgun.