Kristján Þór Júlíusson, nýr sjávarútvegs- og landbúnaðarráðherra, hefur samtals þegið hátt í 6 milljónir í laun og styrki frá Samherja, stærsta útgerðarfélagi landsins, undanfarna tvo áratugi og er vinur Þorsteins Más Baldvinssonar, forstjóra fyrirtækisins, til margra ára.

Þetta kemur fram í Facebook-færslu frá Kristjáni, en hann greindi frá því í samtali við Stundina í síðustu viku að vegna tengsla sinna við Samherja myndi hann hugsanlega stíga til hliðar í málum er varða rekstur sjávarútvegsfyrirtækisins með beinum hætti. Efnislega bætir þessi færsla Kristjáns Þórs ekki miklu við þær upplýsingar sem fram komu í svari Kristjáns Þórs til Stundarinnar í síðustu viku þar sem miðillinn spurði ráðherrann spurninga um tengslin við Samherja en orðalagið og inntakið er nokkurn veginn það sama. 

Kristján telur sig hæfan til að gegna embætti sjávarútvegsráðherra og taka ákvarðanir um málefni er snerta sjávarútveginn á Íslandi í heild sinni, þrátt fyrir að Samherji sé stærsta útgerðarfélag landsins og ákvarðanir um álagningu veiðigjalda, gjaldtöku í sjávarútvegi almennt og úthlutun kvóta skipti miklu fyrir hagsmuni og rekstrargrundvöll þess.

Samherji, sem er í hópi þeirra fyrirtækja sem ráða yfir mestum kvóta, hagnaðist um 14,3 milljarða í fyrra, en samanlagður hagnaður Samherjasamstæðunnar í efnahagsuppsveiflunni frá 2011 nemur hátt í 90 milljörðum.

Í Facebook-færslu sinni segir Kristján mikilvægt að kjósendur, fjölmiðlar og aðrir stjórnmálamenn séu meðvitaðir um tengsl sín við sjávarútveginn og geti metið og gagnrýnt störf sín með hliðsjón af þeim. 

„Í því samhengi er mér ljúft og skylt að upplýsa að við Þorsteinn Már Baldvinsson, forstjóri Samherja, höfum þekkst síðan við vorum ungir menn. Fyrir um tuttugu árum (1996–2000) sat ég í stjórn Samherja, þar af sem stjórnarformaður í u.þ.b. eitt og hálft ár. Samtals 27 daga, í ágúst 2010 og júlí 2012, fór ég sem háseti á makrílveiðar. Einu launin sem ég hef þegið hjá fyrirtækinu eru fyrir áðurnefnda stjórnarsetu þar sem stjórnarlaun voru tæp 30 þúsund á mánuði og stjórnarformaður fékk tvöföld þau laun. Hásetahluturinn fyrir veiðitúrinn í ágúst 2010 var 1.374.929 kr og í júlí 2012 1.661.800 kr. Fyrirtækið hefur síðan tvisvar styrkt framboð mitt í prófkjöri innan Sjálfstæðisflokksins, 500 þúsund kr. árið 2007 og 100 þúsund kr. árið 2013,“ skrifar Kristján. Af þeim tölum og upplýsingum sem hér eru nefndar má ráða að Kristján hafi allt í allt þegið rúmar 5,5 milljónir frá Samherja frá árinu 1996 í styrki, laun og stjórnarlaun.

„Ég tel mig vera hæfan til þess að taka ákvarðanir um málefni sem snerta sjávarútveginn á Íslandi í heild sinni. Komi upp mál sem snerta Samherja sérstaklega mun ég að sjálfsögðu meta hæfi mitt í ljósi framangreinds líkt og allir stjórnmálamenn þurfa að gera þegar fjölskyldu-, vina- og kunningjatengsl gætu haft áhrif á afstöðu til einstakra mála,“ skrifar Kristján.