Hin átta ára gamla Mary frá Nígeríu hefur fengið dvalarleyfi á Íslandi ásamt foreldrum sínum Joy og Sunday. Halldór Kristján Þorsteinsson, lögmaður fjölskyldunnar, segir í samtali við Stundina að fjölskyldan hafi verið kölluð á fund hjá Kærunefnd útlendingamála í morgun þar sem þeim var tilkynnt að kærunefndin hafi lagt fyrir Útlendingastofnun að veita þeim dvalarleyfi á grundvelli 74. greinar laga um útlendinga, um dvalarleyfi á grundvelli mannúðarsjónarmiða.  

Á síðasta degi þingsins í síðasta mánuði samþykkti Alþingi breytingar á útlendingalögum sem gerði Mary kleift að fá endurupptöku á sínu máli. Lögin, sem samþykkt voru til bráðabirgða, styttu frest stjórnvalda til að vinna úr umsókn barns um hæli. Í málum sem heyra undir Dyflinnarreglugerðina var fresturinn styttur úr tólf mánuðum í níu og í málum þar sem umsókn hefur verið tekin til málsmeðferðar var fresturinn til að veita barni dvalarleyfi á grundvelli mannúðarsjónarmiða styttur úr 18 mánuðum í 15 mánuði. Síðari breytingin kom sér til góða fyrir Mary og fjölskyldu hennar, enda hafði hún dvalið hér á landi lengur en í 15 mánuði. 

Allir flokkar samþykktu breytinguna nema Sjálfstæðisflokkurinn, sem taldi hana auka hættu á mansali. Lögfræðingur Rauða krossins sagði það hins vegar ólíklegt þar sem um væri að ræða breytingu til bráðabirgða, lögðin næðu aðeins yfir börn sem væru þegar komin til landsins og að einungis væri um að ræða styttri tímafresti. 

Halldór segir að í dag sé fjölskyldunni þakklæti efst í huga. „Það hafa svo margir komið að þessu,“ segir hann. „Bæði einstaklingar úti í bæ og frjáls félagasamtök sem hafa hjálpað þeim og það hefur greinilega skipt miklu máli. Það er fyrst og fremst pólitískum þrýstingi að þakka að þau fengu dvalarleyfi. Þessi breyting sem gerð var á Alþingi hefði aldrei komið til án þessa þrýstings. Það er fólkinu sem beitti þessum þrýstingi að þakka að þau fá dvalarleyfi og aðrar fjölskyldur í sömu stöðu. Svo auðvitað þingheimur sjálfur, þeir sem stóðu að því að koma þessu frumvarpi í gegn, þeim ber auðvitað að þakka.“

Fórnarlamb mansals

Halldór segir mikinn mun á andlegri líðan fjölskyldunnar frá því í sumar og brottvísun þeirra var yfirvofandi. „Nú brosa þau og hlæja,“ segir hann. 

Stundin sagði sögu fjölskyldunnar í júlí síðastliðnum en móðir Mary, Joy Lucky, er fórnarlamb mansal og var neydd í vændi áður en hún kom til Íslands. Faðir Mary, Sunday Iserien, flúði Nígeríu vegna pólitískra ofsókna en hann óttaðist mjög um líf sitt í heimalandinu. Þau sögðu þetta eina og hálfa ár sem þau höfðu þá dvalið hér á landi vera í fyrsta sinn í áratug sem þau hafi upplifað öryggi.