Logi Einarsson, formaður Samfylkingarinnar, gagnrýnir Ingu Sæland, formann Flokks fólksins, fyrir að „kasta fram krassandi ummælum, væntanlega til að fá athygli, hlaupa svo frá þeim jafnharðan, segjast vera misskilinn og jafnvel verða fyrir óhróðri.“

Inga nefnir Loga á nafn í viðtali við DV í dag þar sem hún vísar á bug ásökunum um að hún sé að etja saman hælisleitendum og öryrkjum. Hennar gagnrýni snúist um langan málsmeðferðartíma hjá Útlendingastofnun. „Þeir segja að ég sé að etja saman hælisleitendum og öryrkjum, það er ósatt, það er einungis þannig sem þeir kjósa að túlka það sem ég segi, spurning hvaða stimpil þeir vilja setja á sjálfa sig. Fólki væri nær að snúa bökum saman um þær hugsjónir að útrýma hér fátækt en að reyna að ata okkur auri og snúa út úr málflutningi mínum,“ segir Inga meðal annars í viðtalinu í DV. 

Logi rifjar hins vegar upp ummæli sem höfð voru eftir Ingu í frétt á Eyjunni í mars síðastliðnum. Ummælin lét Inga falla í færslu á Facebook, sem hún síðar eyddi. „Þar stingur hún uppá að fjármagn sem fari í að aðstoða hælisleitendur, á meðan umsóknir þeirra eru teknar fyrir, verði frekar nýtt til að hjálpa fátækum Íslendingum. Í færslunni sagði hún orðrétt: „Hælisleitendur sem fordæmin sýna að munu ekki fá hæli hér. Hælisleitendur sem hafa frían leigubíl, (vilja frekar taka leigubíl en nota strætó) Bónuskort, debetkort (með inneign frá ísl. ríkinu) fría læknisþjónustu, húsnæði, tannlækni, sálfræðing, og fl. og fl.“ Í framhaldinu viðraði hún þá skoðun hvort ekki mætti nýta það fjármagn sem færi í að „halda uppi þessu fólki“ í mislangan tíma áður en því væri vísað burt,“ skrifar Logi. 

Þá segir hann niðurskurð í málum hælisleitenda ekki vera svar í báráttu gegn fátækt. Ráðast þurfi í stærri breytingar á skattkerfinu til að ná raunverulegum árangri. „Ég vil að Ísland geri sitt til þess að hjálpa hælisleitendum og flóttamönnum sem best og sem betur fer hefur tekist að ná pólitískri samstöðu um þessi mál, þó eflaust þurfi að gera betur. Ég ítreka það að brýnasta verkefni íslenskra stjórnmála er barátta fyrir auknum jöfnuði og útrýming fátæktar. En ég endurtek einnig að Samfylkingin mun ekki reyna að verða sér úti um atkvæði með því að fiska í gruggugu vatni, ala á ótta og tortryggni,“ skrifar Logi. 

Líkti sjálfri sér við Marine Le Pen

Flokkur fólksins náði ekki inn manni í síðustu Alþingiskosningum en mældist með 8,4 prósent fylgi í nýlegri könnun Gallup. Inga hefur að undanförnu vakið talsverða athygli fyrir ummæli sín, en í viðtali á RÚV á dögunum sagðist hún meðal annars vera sátt við að vera kölluð popúlisti og líkti sjálfri sér við Marine Le Pen, fyrrverandi formann frönsku Þjóðfylkingarinnar. Ég er sennilega svona Marine Le Pen týpa sem er verið að mála mig af þeim sem munu hvort sem er aldrei kjósa flokkinn. Af okkur stafar ógn vegna þess að við erum boðberi breytinga. Við erum einlæg og heiðarleg og við vinnum af hugsjón og við ætlum að halda því áfram og við erum bara sátt við að vera popúlistar. Ég ætla að segja að það þýði bara það að vera vinsæll í dag,“ sagði hún meðal annars.