„Það er verið að dæla alveg svakalega miklu efni sem er hlaðið kvenfyrirlitningu á unga karlmenn,“ sagði Katrín Jakobsdóttir fyrrverandi forsætisráðherra í umræðum á kvenréttindadeginum nú í dag. Ungt fólk telur í auknum mæli að konur og karlar séu ekki jafn hæfir leiðtogar samkvæmt leiðtogavísitölu Heimsþings kvenleiðtoga, Reykjavik Index, sem mælir viðhorf samfélaga gagnvart leiðtogum út frá kynjajafnrétti.

Háskóli Íslands og Heimsþing kvenleiðtoga héldu viðburðinn Hverjum treystum við til forystu? í Loftskeytastöðinni og hófu þannig samstarf um úrvinnslu og greiningu gagna leiðtogavísitölunnar. Niðurstöður sýna að kynjafordómar hafa almennt aukist milli ára frá því að fyrsta könnun fór fram árið 2018.

„Á degi sem þessum er það holl áminning um að framfarir eru hvorki sjálfgefnar né óafturkræfar,“ sagði Finnborg Salome Steinþórsdóttir, lektor í kynjafræði við Háskóla Íslands, en hún hélt erindi um niðurstöðurnar á viðburðinum. „Við gefum okkur stundum að þetta komi allt með kalda vatninu, að við færumst skrefi nær …