Bláa lónið hf. og Arctic Adventures hf. hafa undirritað samkomulag um samruna og Bláa lónið hefur hafið formlegan undirbúning að skráningu á hlutabréfamarkað.

Þetta kemur fram í fréttatilkynningu. Samkomulagið er gert með fyrirvara um áreiðanleikakönnun á báðum félögunum, samþykki Samkeppniseftirlitsins og samþykki hluthafafunda félaganna.

Á dögunum var tilkynnt um að ekkert yrði af samruna Arctic Adventures og Kynnisferða, sem starfa undir vörumerkinu Icelandia.

Bláa Lónið er móðurfélag fyrirtækja á sviði upplifunarferðaþjónustu, heilsu og vellíðunar á meðan Arctic Adventures rekur meðal annars vinsæla áfangastaði á borð við Fjaðrárgljúfur, Kerið og Raufarhólshelli.

„Það er markmið okkar að Bláa Lónið leiði áfram uppbyggingu og fjárfestingar sem staðsetja Ísland sem einn af fremstu upplifunar og vellíðunar áfangastöðum heims,“ er haft eftir Sigríði Margréti Oddsdóttur, forstjóra Bláa Lónsins. „Kaup á Arctic Adventures er mikilvægt skref í þá átt. Upplifun og vellíðan er bæði okkar sérstaða og styrkleiki.“ …