„Eru þið í alvöru stolt af þessu?“ spyr Ingibjörg Stefánsdóttir, sem hefur setið í flokksstjórn Samfylkingarinnar, um afstöðu flokksins til brottfararstöðvar sem samþykkt var á Alþingi í gær.

Fjöldi áhrifafólks úr röðum Samfylkingarinnar undanfarin ár tekur í sama streng á samfélagsmiðlum eftir að málið, sem ríkisstjórn Kristrúnar Frostadóttur stóð fyrir, náði í gegn.

Samfylkingin birti færslu á Facebook-síðu sinni í gær þegar lögin um brottfararstöð voru samþykkt. Voru taldar upp þær aðgerðir sem ríkisstjórnin hefur staðið fyrir „til að vinna að breiðri sátt í samfélaginu um útlendingamál“ undir yfirskriftinni: „Við styrkjum Ísland með ábyrgð í útlendingamálum“.

„Skammarblettur á Samfylkingunni!“ skrifar Hrannar Björn Arnarsson sem var aðstoðarmaður Jóhönnu Sigurðardóttur, þá formanns Samfylkingarinnar, þegar hún var forsætisráðherra.

„Það skapar ekki „breiða sátt í samfélaginu um útlendingamál“ að innleiða stefnu Miðflokksins í útlendingamálum,“ skrifar Óskar Steinn Ómarsson, fyrrverandi ritari Samfylkingarinnar.