Þingflokksformaður Miðflokksins, Sigríður Andersen, sagði þingsályktunartillögu um þjóðaratkvæðagreiðslu ekki gilda á næsta þingi þegar hún var spurð í Kastljósi á RÚV í gærkvöldi hvort flokkurinn hygðist virða niðurstöður þjóðaratkvæðagreiðslunnar um aðildarviðræður við Evrópusambandið, að því gefnu að samþykkt væri að ganga til viðræðnanna.

Þorgerður Katrín Gunnarsdóttir, utanríkisráðherra og formaður Viðreisnar, tókst á við kollega sinn og krafðist skýrari svara um það hvort stjórnarandstaðan hygðist virða þjóðarviljann ef svarið yrði jákvætt við ESB.

Sigríður Andersen bar fyrir sig að það væri ýmislegt óljóst í málinu og sagði þjóðaratkvæðagreiðslu vera „sýndarsamráð við þjóðina“.

„Til dæmis tímaramminn á aðildarviðræðunum. Líta menn þannig á að ríkisstjórnin hafi óútfylltan tékka til aðildarviðræðna? Meðal annars til tímarammans? Ætlar hún [ríkisstjórnin] að gefa sér átján til 24 mánuði?“ spurði Sigríður.

Þingsályktunartillaga ekki óútfylltur tékki

Þáttastjórnandi gekk á hana eftir skýrari svörum, þá svaraði Sigríður: „Ég mun auðvitað bara svara því að [þetta] er ekki óútfylltur tékki. Ég meina þessi ríkisstjórn og þessi þingsályktunartillaga, hún auðvitað gildir ekki á næsta þingi, það eru meginreglurnar.“

Þorgerður Katrín sagði þarna skýran mun á ríkisstjórninni og minnihlutanum – að ríkisstjórnin hefði sagt skýrt að hún muni virða þjóðaratkvæðagreiðsluna, eins og Heimildin greindi frá í byrjun mánaðarins. Heimildin gekk á eftir svörum allra flokka á þingi um skýr svör um hvort flokkarnir myndu virða niðurstöður þjóðaratkvæðagreiðslunnar í lok apríl síðastliðins. Engin formleg svör hafa borist frá minnihlutanum, en meirihlutinn svaraði spurningum Heimildarinnar skýrt, og sagði að niðurstaðan yrði virt, hvernig sem færi.

Þorgerður Katrín GunnarsdóttirUtanríkisráðherra gekk á eftir svörum Miðflokksins um það hvort hann hygðist virða þjóðarviljann.

Mynd: Golli

„Það sem hefur alveg komið skýrt fram, og það er munurinn á stjórn og stjórnarandstöðu, [er að] allir ríkisstjórnarflokkarnir hafa sagt mjög skýrt að við munum virða niðurstöður þjóðaratkvæðagreiðslunnar, hvort sem það er já, eða hvort sem það er nei,“ sagði Þorgerður Katrín og hélt áfram: „Það sem hefur hins vegar ekki komið skýrt fram, er einmitt hvað stjórnarandstaðan ætlar að gera. Það hefur ekki komið eitt einasta skýra svar varðandi hvort þau ætli að virða þjóðaratkvæðagreiðsluna.“

Þingmenn settir til hliðar

Sigríður spurði um tímarammann sem ríkisstjórnin gerði ráð fyrir að samningaviðræðurnar tækju. Þorgerður sagðist ekki gera ráð fyrir öðru en að það tæki í mesta lagi 20 mánuði. Sigríður spurði þá hvað ef það tækist ekki. Þorgerður svaraði því til að Viðreisn myndi þá virða þjóðarviljann.

„Þið hafið ekki svarað því skýrt hvort að þið ætlið að virða þjóðarviljann,“ sagði Þorgerður og spurði hreint út: „Ætlið þið, ef þið komist í ríkisstjórn, ætlið þið að virða þjóðarviljann? Getur þú sagt mér, já eða nei?“

„Þú talar bara eins og þjóðin ráði þessu, það er búið að setja þingmenn til hliðar,“ sagði Sigríður og klykkti út: „… í þínum augum.“

Að lokum svaraði Sigríður: „Nei, ég mun áfram berjast gegn aðild. Ég mun áfram berjast gegn aðild Íslands að Evrópusambandinu.“

Þingkosningar eru næst haldnar árið 2028, nema boðað verði til kosninga fyrr.