Það var að áliðnu kvöldi fyrir skömmu að Donald Trump var að fikta við eitthvað gervigreindarforritið … ég hef svosem ekki hugmynd um hvort það var að kvöldlagi en tek mér bara skáldaleyfi… myndin sem birtist honum á skjánum fannst honum bara nokkuð fín.
Eins og gamla manninum er tamt þegar honum finnst hann hafa eitthvað fram að færa þá sendi hann myndina lóðbeint inn á samfélagsmiðilinn Truth Social. Þar og á öðrum samfélagsmiðlum birtist hún á örskotsbragði.
Þegar sá gamli lagðist á gullbryddaðan dúnkoddann var hann mjög sáttur með dags- nú eða kvöldverkið. Hann hafði að vísu átt í einhverju orðaskaki við blessaðan páfann, sem ergði hann svolítið. Leó XIV sem fæddist víst í Bandaríkjunum, heitir í raun Robert Francis Prevost og er fyrsti Bandaríkjamaðurinn til að setjast á páfastól.
Bandaríkjaforseta þótti páfinn hafa gengið alltof langt í friðarboðskap sínum. „Hvað er þessi gaur að rífa kjaft?“ (skáldaleyfið aftur) hugsaði hann og leit aftur á gervigreindarmyndina góðu sem sýndi hann sjálfan í hlutverki frelsarans að lækna eða vekja upp frá dauðum góðvin sinn Jeffrey Epstein.
Við það sofnaði Trump og líklega dreymdi hann gjöreyðingu Írans og skemmtilegan fund með vini sínum og félaga Benjamín Netanyahu, forsætisráðherranum í Ísrael. Á meðan forsetinn svaf fór hálfur heimurinn, sá hluti sem ekki var steinsofandi á þeim tíma sólarhrings, á annan endann. Gervigreindarmyndin fór á flug. Sumir hlógu en aðrir grétu því að myndin var einstök.
Forseti gagnrýnir Páfa
Leo XIV páfi rómversk-kaþólsku kirkjunnar hefur ekki átt upp á pallborðið hjá Donald Trump eftir að hann sagði ekki við hæfi að beita frelsaranum, Jesú Kristi, fyrir sig í áróðursstríði til þess að réttlæta styrjaldarrekstur.
Eftir að núverandi stjórn tók við valdataumunum í Hvíta húsinu hafa kristnir bókstafstrúarprédikarar fengið jafnvel mun meira vægi en áður var. Þessum prédikurum fylgir fjöldinn allur af fólki sem er fóðrað með ýmsum afskaplega misgóðum boðskap á borð við þann að Jesús Kristur sjálfur sé með þeim í herliði.
Þó kviknar óneitanlega sú spurning hvaða bækur þetta fólk sé eiginlega að lesa. Þegar ég hef gripið niður í Nýja testamentið hefur friðar- og kærleiksboðskapur Jesú yfirleitt birst mér. Í þeirri bók er ekki hvatt til þess að drepa mann og annan til að ná fram vilja sínum heldur bent á að elska náungann og friðinn. Það er grunnboðskapur Jesú.
Lúkasarguðspjall 6. Kafli
Elskið óvini yðar
27 En ég segi yður er á mig hlýðið: Elskið óvini yðar, gerið þeim gott sem hata yður, 28 blessið þá sem bölva yður og biðjið fyrir þeim er misþyrma yður. 29 Slái þig einhver á kinnina skaltu og bjóða hina og taki einhver yfirhöfn þína skaltu ekki varna honum að taka kyrtilinn líka. 30 Gef þú hverjum sem biður þig og ef einhver tekur frá þér það sem þú átt þá skaltu ekki krefja hann um það aftur. 31 Og eins og þér viljið að aðrir menn geri við yður, svo skuluð þér og þeim gera.
Nú er ég að gera nákvæmlega það sem bókstafstrúað kristið fólk gerir mjög oft. Ég hef tekið örlítið brot úr Nýja testamenti Biblíunnar, skellt því fram til að sannfæra þig lesandi góður um að ég hafi höndlað sannleikann. Ég fullvissa þig um að sannleikurinn er afstæður og ég fyrir mína parta er enn að leita hans af kappi.
Ég get nefnt þónokkur önnur dæmi sem segja Jesú frá Nasaret ekki hafa verið maður ofbeldis. Einmitt þess vegna er það hreint og beint rangt að beita honum fyrir stríðsmaskínu eins öflugasta herveldis okkar tíma.
Krossferð Trump stjórnarinnar
Samt gerir Pete Hegseth ráðherra hermála í Trump-stjórninni nákvæmlega það. Hann á sér uppáhalds prédikara, sem heitir Brooks Potteiger. Sá hefur talað til háttsettra í Bandaríkjaher með reglulegu millibili undanfarin misseri að undirlagi Hegseths.
Þeir kumpánar hafa gengið svo langt að segja að stríðið gegn Íran sé krossferð, heilagt stríð. Í mínum huga hljómar það ekki ólíkt þeim mönnum sem telja sig til íslamista og vilja heyja heilagt stríð gegn hverjum þeim sem ekki vill lifa eftir því sem í Kóraninum stendur.
Fleiri koma upp í hugann. Þar má nefna James Talarico sem nú er að berjast um annað sæti Texasríkis í öldungadeild Bandaríkjaþings. Hann er demókrati og segist opinskátt vera kristinn, er guðfræðingur að mennt og hefur setið á ríkisþingi Texas. Talarico kom við kauninn á bókstafstrúarfólki sem vildi binda í lög að boðorðin tíu yrðu límd upp með kennaratyggjói á veggi allra kennslustofa í Texas.
Hann barðist gegn því enda væru ungmennin sem sitja í kennslustofunum ekki öll kristinnar trúar. Orðræða Talarico er sannarlega allt önnur en Brooks Potteiger sem hefur hvatt til þess að þingmaðurinn verði krossfestur eins og sést og heyrist í myndbandinu í hlekknum hér að ofan. Talarico andmælir og gagnrýnir Trump, segir að ekki eigi að nota boðskap Krists til að berja bumbur stríðsrekstrar og hann er alfarið andvígur árásinni á Íran.
Nýja testamentið og það gamla
Öðru langar mig að vekja athygli á, sem er að Biblían er rituð af mönnum en ekki Guði. Skráning Gamla testamentisins tók um 700 ár. Ég veit að elsta rit Nýja testamentisins er skrifað rúmlega 20 árum eftir krossfestingu Jesú og það yngsta um 130 eftir Krist.
Nýja testamentið er sem sagt skrifað á um 100 ára tímabili. Engin upphafleg handrit eru til af textum Nýja testamentisins. Ritningin hefur líka margsinnis verið þýddir og oft endurrituð. Við eigum Nýja testamentið á grísku og Gamla testamentið á hebresku, en suma texta eigum við bara í þýðingum eins og Tómasarguðspjall sem að vísu er ekki hluti af Nýja testamentinu.
Af einhverjum ástæðum var það guðspjall tekið út fyrir sviga en nú er það lesið og rannsakað eins og önnur rit þeirra sem þekktu til Jesú frá Nasaret. Flest rit Gamla testamentisins voru skrifuð á hebresku, Daníelsbók á arameiísku, apókrýfar bækur og Nýja testamentið á grísku.
Þessir textar voru svo þýddir á latínu og sú þýðing svo notuð þegar þessu riti var snúið á öll heimsins tungumál. Hebresku og grísku textarnir fóru aldrei úr notkun, gyðingar lásu þann hebreska og sá gríski var notaður í Austurkirkjunni, eða Rétttrúnaðarkirkjunni.
Gera má ráð fyrir að eitthvað hafi skolast til og að margt sé alls ekki hárnákvæmt í samanburði við upprunalegan texta. Fræðimenn vinna enn hörðum höndum við að rýna í forna, nýlega uppgötvaða texta Nýja testamentisins og vinna með texta sem skrifaðir eru á papýrus og kálfsskinn. Textana er með tækni nútímans unnt að aldursgreina með nokkurri nákvæmni.
Bókstafs- og blind trú
Með þessum skrifum langar mig fyrst og fremst að árétta og vekja athygli á því að það sem er ritað í Biblíunni eru ekki orð Guðs heldur orð rituð af mönnum sem vildu segja okkur hvað Guð og seinna Jesú frá Nasaret eiga að hafa boðað.
Boðskapur texta Nýja testamentisins um mannkærleika og þær leikreglur sem Jesú lagði fram í nafni föður síns, Guðs, eru enn í dag góðar og gildar. Hvernig sem á það er litið hafa rit biblíunnar haft gríðarleg áhrif á menningu okkar sem teljumst til kristinna og í raun heimsbyggðarinnar allrar.
Skautunin í umræðunni er samt mögnuð og það að Bandaríkjaforseti skuli láta sér detta í hug að ráðast að páfanum með látum og fordæma andóf hans við því að beita Kristi sem hvata til ofbeldis.
Páfi kveðst munu halda áfram að tala fyrir friði og manngæsku hvað sem tautar og raular. Í raun er óhætt að segja að batnandi Páfum sé best að lifa. Páfagarður hefur einmitt oft kvatt til ofbeldis og styrjalda í aldanna rás.
Krossferðirnar voru farnar til að ganga á milli bols og höfuðs á múslimum og til að frelsa Jerúsalem að undirlagi kirkjunnar í Róm á árabilinu 1095 til 1291. Borgin sú leikur lykilhlutverk í sögu gyðinga, kristinna og múslima. Meðan á krossferðunum stóð var friðarboðskapnum sannarlega stungið undir stól í talsverðan tíma.
Kirkjur, biskupar, prófastar og prestar hafa gegnum alla söguna tekið sér stöðu við hlið eins stríðsherrans eða annars. Prelátarnir hafa blessað herina og beðið fyrir góðu gengi þeirra sem þýðir í reynd að þeir báðu Guð um liðsinni við að drepa andstæðingana.
Donald Trump hefur nú fjarlægt gervigreindarmyndina góðu af samfélagsmiðlum og vill helst ekki ræða hana frekar. En hnútuköstum hans í garð páfa linnir ekki. JD Vance, varaforseti Bandaríkjanna sem gerðist kaþólskur 2019, hefur lýst því yfir að Leo XIV páfi ætti að hætta þessu stagli um frið og láta guðhrædda menn eins og hann sjálfan, Trump og Hegseth um að tala um guðlega forsjón í stríði.
Kaþólikkar hafa ekki látið af gagnrýninni gegn Bandaríkjastjórn og Leo XIV heldur áfram að boða kærleik og frið. Ég verð samt að taka það fram hér að þótt það sé gott og gilt að páfinn sé friðarins og kærleikans maður er saga kaþólsku kirkjunnar oft og tíðum hreint ekki falleg.
Páfar hafa ráðskast með veraldleg mál, hvatt til ofbeldis og látið sem illvirki gagnvart börnum sem áttu að heita skjólstæðingar þeirra hafi ekki átt sér stað. Fjármálamisferli og morð koma líka upp í hugann. Batnandi fólki er best lifað ku hafa verið sagt einhver tímann og vonandi á það við þá sem stjórna þessari afar umdeildu stofnun sem kaþólska kirkjan er.
Athugasemdir