Ríkisstjórnin kynnir í dag nýja atvinnustefnu og aðgerðaáætlun vegna hennar. Þetta er í fyrsta sinn sem opinber atvinnustefna er kynnt og með henni á að hverfa frá fyrri stefnu. Aðgerðaáætlunin er í 35 liðum.

„Við erum mjög stoltar af þessu. Það er rosaleg vinna sem liggur á bakvið þetta,“ sagði Kristrún á blaðamannafundi rétt í þessu. „Þetta er bara konkret,“ sagði hún.

Lítill sem enginn hagvöxtur

Í atvinnustefnunni er tekið fram að árangur hagstjórnarinnar hafi verið lítill síðustu ár. Kristrún Frostadóttir forsætisráðherra segir í ávarpi að horfið verði frá fyrri atvinnustefnu.

„Hagvöxtur á mann hefur verið afar takmarkaður á undanförnum 5 árum og lakari á Íslandi en í helstu samanburðarlöndum. Brýnt er að snúa þeirri þróun við,“ segir þar. „Hagvöxtur sem drifinn er af fólksfjölgun skapar álag á opinbera þjónustu og alla helstu innviði. Mikilvægt er að stuðla að því að þróun atvinnulífs sé í jafnvægi við innviði og umhverfi.“

„Þá hefur hlutfall innflytjenda á Íslandi tvöfaldast á einum áratug og farið úr um 9% í 19%. Þetta hefur samfélagslegar afleiðingar,“ segir Kristrún í ávarpi atvinnustefnunnar.

Í aðgerðaráætluninni er kveðið á um orku- og innviðaumbreytingu, öflugan mannauð, eflingu vísinda og nýsköpunar og sátt um öflugar auðlindagreinar.

Þar er boðað að 1,1 milljarður króna verði lagður í þróun gervigreindar og„markvissan stuðning stjórnvalda við rannsóknir, þróun og innleiðingu tæknilausna til kolefnisföngunar við uppruna losunar“.

Þá tilkynnti ríkisstjórnin samtímis um lækkun á virðisaukaskatti eldsneytis úr 24% í 11% frá 1. maí til 31. ágúst til að bregðast við verðhækkunum eftir Íransstríðið.