Ari Edwald var kynntur sem fyrsti maður á lista Miðflokksins fyrir borgarstjórnarkosningar á mánudag eftir að myndband fór í dreifingu á samfélagsmiðlum af jakkafataklæddum nýjum oddvita sem ekki sást í andlitið á.

Ara hefur verið stillt upp sem reynslumiklum manni úr viðskiptalífinu til að stýra Reykjavíkurborg eins og vel reknu fyrirtæki. Viðskiptasaga hans er fjölbreytt en hann fór úr starfi í pólitík yfir í hagsmunabaráttu og þaðan í að leiða tvö fyrirtæki sem oft hefur gustað um. Inn á milli sinnti hann eigin fjárfestingum, meðal annars með stærsta leigufélagi landsins á sínum tíma. Þá hafa stjórnmálaskoðanir hans ekki alltaf rímað við það sem Miðflokkurinn stendur fyrir nú.

Ari er 61 árs gamall, menntaður í lögfræði við Háskóla Íslands og með MBA-gráðu frá University of San Francisco. Hann starfaði í Heimdalli og Sambandi ungra sjálfstæðismanna og varð aðstoðarmaður Þorsteins Pálssonar til átta ára, fyrst í dóms- og kirkjumálaráðuneytinu og svo í …