Sautján ára piltur lést í umferðarslysinu á Miklubraut i Reykjavík í gærkvöldi. Hann var farþegi í bifreið sem var ekið austur Miklubraut þegar slysið varð, á móts við hús Hjálpræðishersins.

Ökumaðurinn, piltur á sama aldri, slasaðist töluvert og er líðan hans eftir atvikum.

Lögreglan á höfuðborgarsvæðinu og rannsóknarnefnd samgönguslysa rannsaka tildrög slyssins.

Boðað hefur verið til kyrrðarstundar í Árbæjarkirkju í dag klukkan 16 vegna slyssins.

„Í ljósi sorglegs slyss sem varð í gær verður haldin kyrrðarstund í Árbæjarkirkju í dag. Séra Þór Hauksson leiðir stundina og Guðmundur organisti leikur undir. Gestum gefst kostur á að tendra kerti í friði og hljóðri minningu. Kyrrðarstundin hefst klukkann 16:00 og eru allir hjartanlega velkomnir,“ segir í tilkynningu Árbæjarkirkju á Facebook.