Sendinefnd frá Bandaríkjaþingi, skipuð fulltrúum beggja flokka, hóf heimsókn sína til Kaupmannahafnar í dag til að lýsa yfir stuðningi við Danmörku og Grænland eftir að Donald Trump, forseti Bandaríkjanna, hótaði að yfirtaka landið, sem er sjálfstjórnarsvæði innan Danmerkur.

Tveggja daga heimsóknin fer fram samhliða því að Evrópa sýnir stuðning sinn í verki með hernaðarlegri könnunarferð til Grænlands.

Þingmennirnir ellefu áttu að funda með Mette Frederiksen, forsætisráðherra Danmerkur, og Jens-Frederik Nielsen, starfsbróður hennar á Grænlandi.

Hópurinn kom til Dansk Industri, samtaka atvinnurekenda í Danmörku, um hádegisbil til viðræðna við leiðtoga í viðskiptalífinu.

Síðar áttu þeir að hitta þingmenn á danska þinginu, þar sem grænlenski fáninn var dreginn að húni í dag til að sýna samstöðu.

Ekki til söluBolir eru til sölu í höfuðborg Grænlands með yfirlýsingum gegn ásælni Bandaríkjaforseta í landið.

Mynd: AFP

„Við sýnum samstöðu beggja flokka með íbúum þessa lands og með Grænlandi. Þau hafa verið vinir okkar og bandamenn í áratugi,“ sagði öldungadeildarþingmaður demókrata, Dick Durbin, við fréttamenn.

„Við viljum að þau viti að við kunnum mikils að meta það. Og yfirlýsingar forsetans endurspegla ekki það sem bandaríska þjóðin telur,“ bætti hann við um Trump.

Fréttamaður AFP í Kaupmannahöfn sá stóran svartan sendibíl yfirgefa skrifstofu Frederiksen skömmu fyrir hádegi að íslenskum tíma en skrifstofa hennar neitaði að staðfesta hvort fundurinn hefði farið fram.

Heimsókn sendinefndarinnar fylgir í kjölfar fundar í Washington á miðvikudag þar sem danskir fulltrúar sögðu að Danir og Bandaríkjamenn væru í „grundvallaratriðum ósammála“ um framtíð Grænlands, sem þýðir í stuttu máli að stefna stjórnvalda í Bandaríkjunum er að yfirtaka Grænland „með góðu eða illu“.

Í Nuuk, höfuðborg Grænlands, fögnuðu íbúar stuðningsyfirlýsingunni.

„Bandaríkjaþing myndi aldrei samþykkja hernaðaraðgerðir á Grænlandi. Þetta er bara einn hálfviti að tala,“ sagði 39 ára fulltrúi verkalýðsfélags við AFP.

„Ef hann gerir það verður hann ákærður fyrir embættisbrot eða rekinn. Ef fólk á þingi vill bjarga eigin lýðræði verður það að grípa til aðgerða,“ sagði fulltrúi verkalýðsfélagsins, sem baðst nafnleyndar.

Heimtar enn Grænland

Trump heldur því fram að Bandaríkin þurfi á hinu auðlindaríka Grænlandi að halda og hefur gagnrýnt Danmörku fyrir að gera ekki nóg, að hans sögn, til að tryggja öryggi þess.

Bandaríkjaforseti hefur haldið þessum rökum á lofti, þrátt fyrir að Grænland, sem er hernaðarlega mikilvægt og hluti af Danmörku, sé undir öryggisvernd NATO.

Hernaðarmenn voru sýnilegri í Nuuk í dag, að sögn fréttamanns AFP, tveimur dögum eftir að Danmörk tilkynnti að hún væri að efla varnir sínar á eyjunni.

„Ég held að herlið frá Evrópu hafi ekki áhrif á ákvarðanatökuferli forsetans, né hefur það áhrif á markmið hans um yfirtöku Grænlands,“ sagði Karoline Leavitt, fjölmiðlafulltrúi Hvíta hússins, á blaðamannafundi.

Lars Løkke Rasmussen, utanríkisráðherra Danmerkur, svaraði því til að yfirtaka Bandaríkjanna á Grænlandi væri „útilokuð“.

Liðssöfnun Evrópuþjóða á Grænlandi vegna heræfingar miðar að því að „senda skilaboð“ til „alls heimsins“, þar á meðal Bandaríkjanna, um að Evrópuríki séu staðráðin í að „verja fullveldi sitt“, sagði Alice Rufo, varnarmálaráðherra Frakklands.

Mótmæli á morgun

Bretland, Finnland, Frakkland, Þýskaland, Holland, Noregur og Svíþjóð hafa tilkynnt um liðssöfnun fámenns herliðs til að undirbúa framtíðaræfingar á norðurslóðum.

„Fyrsta teymi franskra hermanna er þegar á staðnum og verður styrkt á næstu dögum með land-, loft- og sjóhergögnum,“ sagði Emmanuel Macron, forseti Frakklands, á fimmtudag.

Stór mótmæli eru fyrirhuguð víðs vegar um Danmörku og Grænland á morgun til að mótmæla landakröfum Trumps.

Þúsundir manna hafa lýst því yfir á samfélagsmiðlum að þeir ætli að taka þátt í mótmælunum sem grænlensk samtök skipuleggja í Nuuk og Kaupmannahöfn, Árósum, Álaborg og Óðinsvéum.

Með Durbin voru í sendinefnd Bandaríkjanna öldungadeildarþingmenn demókrata, Chris Coons, Jeanne Shaheen og Peter Welch, auk repúblikananna Lisa Murkowski og Thom Tillis.

Demókratar úr fulltrúadeildinni í sendinefndinni eru Madeleine Dean, Steny Hoyer, Sara Jacobs, Sarah McBride og Gregory Meeks.