Samfylkingin mælist enn sem áður langstærsti flokkurinn á þingi, með stuðning rétt rúmlega 30 prósent svarenda í nýrri könnun Prósents. Miðflokkurinn kemur þar næst á eftir með tæplega 20 prósenta fylgi. 

Sjálfstæðisflokkur, sem sögulega hefur verið stærsti stjórnmálaflokkur á Íslandi, mælist nú með um það bil jafn mikið fylgi og Viðreisn, sem byrjaði sem klofningur úr Sjálfstæðisflokki árið 2016. Flokkarnir mælast með 13,7 prósent og 13,5 prósent fylgi, en ekki er marktækur munur á fylgi flokkanna. 

Flokkur fólksins mælist með 7,7 prósenta fylgi og er samanlagt fylgi stjórnarflokkanna þriggja því rétt rúmlega 50 prósent. 

Framsóknarflokkur mælist með 5,9 prósent en flokkurinn hefur dansað við fimm prósenta þröskuldinn undanfarin misseri. Nái flokkur ekki yfir 5 prósent atkvæða í kosningum þarf hann að treysta á verulegt fylgi í einhverju kjördæmi til að ná manni inn á þing. 

Píratar og Vinstri græn eru enn fjarri þingsæti, miðað við niðurstöðurnar, og mælast með 3,6 prósent og 3,3 prósent fylgi. Sósíalistar mælast enn neðar, með 2,4 prósent, og fengju miðað við það ekki áframhaldandi fjárstuðning úr ríkissjóði.