Félagið MÍR, Menningartengsl Íslands og Rússlands, leigir Sósíalistaflokknum húsnæði til eins árs.
Sæþór Benjamín Randalsson, formaður framkvæmdastjórnar Sósíalistaflokksins, staðfestir að flokkurinn sé fluttur að Hverfisgötu 105.
Opið hús á vegum flokksins hefur verið auglýst á Menningarnótt með fjöldbreyttri dagskrá frá 12 til 22.
Eftir að ráðandi öfl í flokknum biðu lægri hlut á átakafundi 30. júní um styrktarfélagið Vorstjörnuna, sem á leigusamninginn að Bolholti 6, var skipt um lás og flokknum vísað úr húsnæðinu. Þar eru nú Vorstjarnan og Samstöðin, tveir aðilar sem þegið hafa megnið af opinberum styrkjum til flokksins undanfarin ár og er stýrt af fólki tengdum Gunnari Smára Egilssyni, ábyrgðarmanni Samstöðvarinnar og fyrrum formanni framkvæmdastjórnar flokksins.
Ekkert pólitískt samkrull
Sigurður Hergeir Einarsson, formaður MÍR, segir flokkinn munu leigja húsnæðið til árs til að byrja með en hafi forgang að því að leigja eftir það.
Pláss verður fyrir báða, flokkinn og menningarsamtökin, í sama húsnæði. „Við förum bara yfir í bókasafnið og húsnæði sem við leigðum út áður,“ segir Sigurður.
„Ef menn ætla að bendla pólitísku samkrulli þá fara þeir villu vegar“
Hann segir engin tengsl vera á milli starfsemi flokksins og MÍR. „Þetta kom bara upp í hendurnar á okkur og passaði eins vel og böllur í feita vinnukonu,“ segir Sigurður. „Allt tilviljunum háð og engin pólitík þar á milli svo það sé alveg skýrt. Ef menn ætla að brigsla pólitísku samkrulli þá fara þeir villu vegar.“
MÍR var stofnað árið 1950, þá kennt við Ráðstjórnarríkin, einnig þekkt sem Sovétríkin, en ekki Rússland eitt. Nafnið var valið vegna hugrenningatengsla við rússneska orðið мир sem merkir „friður“. Fyrsti forseti þess var Nóbelsskáldið Halldór Kiljan Laxness.
Reyndar hafa deilur einnig staðið um félagið MÍR undanfarin ár en til stóð að leggja niður félagið, breyta því í styrktarsjóð til þýðingar á rússneskum bókmenntum og selja húsnæðið áður. Samkvæmt frétt Vísis um deilurnar hefur komið til líkamlegra átaka á fundum MÍR.
Félagið var stofnað í marsmánuði 1950 og hlaut nafnið Menningartengsl Íslands og Ráðstjórnaríkjanna, skammstafað MÍR, en orðið mír í rússnesku þýðir í senn friður og heimur. Þegar Sovétríkin (Ráðstjórnarríkin) liðuðust í sundur í árslok 1991 var óhjákvæmilegt að breyta nafni félagsins og takmarka starfsvið þess. Á aðalfundi í mars 1992 var nafninu breytt í Félagið MÍR og nú má lesa úr þeim þremur stöfum heitið Menningartengsl Íslands og Rússlands.