Svandís Svavarsdóttir, formaður Vinstri grænna, segir að víða sé rætt um samstarf flokksins við aðra stjórnmálaflokka um framboð í sveitarstjórnarkosningum á næsta ári.
Vinstri græn misstu allan sinn þingstyrk í síðustu Alþingiskosningum eftir að hafa leitt ríkisstjórn með Sjálfstæðisflokknum og Framsóknarflokknum í nær átta ár. Svandís tók við formennsku í flokknum eftir að Katrín Jakobsdóttir hætti á Alþingi til að bjóða sig fram til forseta í fyrra.
Í færslu á Facebook segir Svandís að undirbúningur flokksins fyrir kosningarnar sé hafinn. „Á föstudaginn var áttum við mikilvægan stjórnarfund þar sem við rýndum stöðuna í sveitarfélögunum og svæðisfélögunum okkar,“ skrifar hún. „Það er skýr þróun að fylgi VG er að mjakast hægt en örugglega upp á við – enda erindi okkar sterkt og skýrt, og það skilar sér!“
„Saman byggjum við sterka framtíð fyrir íslensk sveitarfélög!“
Í kvöld munu ungliðahreyfingar VG og Sósíalistaflokksins halda sameiginlega veislu. „Saman byggjum við sterka framtíð fyrir íslensk sveitarfélög!“ segir Svandís um þetta framtak Ungra vinstri grænna og Roða, ungliðahreyfingar Sósíalistaflokksins.
Hún hvetur fólk til að taka þátt í starfinu. „Víða er nú þegar rætt um mögulegt samstarf við önnur stjórnmálasamtök til að tryggja sterk og samstillt framboð til sveitarstjórna í næstu kosningum,“ skrifar Svandís. „Þetta samstarf og samstaða eru lykillinn að árangri og áhrifum á næsta kjörtímabili.“
Annars á flokkurinn sér enga von eða möguleika til framtíðar