Albert Guðmundsson, atvinnumaður í fótbolta var rétt í þessu sýknaður af ákæru um nauðgun í Héraðsdómi Reykjavíkur. 

Dómurinn var kveðinn upp í Héraðsdómi rétt fyrir klukkan eitt í dag, rúmu ári eftir að fréttir bárust af því að Albert Guðmundsson hefði verið kærður fyrir kynferðisbrot. 

„Þetta breytir engu um upplifun brotaþola sem stendur að sjálfsögðu óhögguð. Þetta mál er sakamál og það fjallar eingöngu um það hvort ströng skilyrði refsingar séu uppfyllt. Það er þá niðurstaðan að þau séu ekki uppfyllt.“

Þetta segir Eva Bryndís Helgadóttir, réttargæslumaður konunnar sem kærði Albert, í samtali við Heimildina. Hún segir að nú sé í höndum ríkissaksóknara að ákveða hvort málið fari í áfrýjun eða ekki. 

Eru þetta vonbrigði?

„Ég myndi aldrei lýsa því þannig. Það eru auðvitað þung og erfið skref að stíga fram og kæra menn, ekki síst sem hafa verið fjölskylduvinir til margra ára. Þannig að mér finnst brotaþoli í þessu máli hafa sýnt með eindæmum hugrekki og styrk og kjark að fara hina lögformlegu réttu leið með sína upplifun. Sem á að fara.“

Eina lögfræðilega rétta niðurstaðan

„Þetta er hárrétt lögfræðileg niðurstaða. Vel rökstuddur dómur. Við fögnum þessu,“ segir Vilhjálmur H. Vilhjálmsson, lögmaður Alberts. 

„Ég hef haft ákveðna skoðun á þessu máli frá fyrstu stundu og ég tel að Héraðsdómur hafi í þessu tilviki komist að hinni einu og sönnu, lögfræðilega réttu niðurstöðu í málinu, og það var að sýkna.“

Aðspurður segir Vilhjálmur það verða að koma í ljós hvernig framhaldið verði. „Fyrsta skrefið er það að ríkissaksóknari verður að taka ákvörðun um það hvort að málinu verður áfrýjað eða ekki. Ríkissaksóknari hefur fjórar vikur til þess með hliðsjón af ítarlegum rökstuðningi.“ 

Málið fyrst fellt niður

Það var í lok ágúst í fyrra sem greint var frá því í fjölmiðlum hér á landi. DV sagði fyrst frá málinu. 

Í byrjun þessa árs felldi héraðssaksóknari málið niður en sú ákvörðun var kærð til ríkissaksóknara sem lagði til við héraðssaksóknara að ákæra yrði gefin út. 

Í byrjun júlí á þessu ári var Albert ákærður fyrir nauðgun með því að hafa haft önnur kynferðismök en samræði við konu án hennar samþykkis. Ákæran var þingfest í héraðsdómi Reykjavíkur 3. júlí og aðalmeðferð í málinu fór fram í september. Albert neitaði sök. 

Ákæruvaldið krafðist þess að Albert yrði dæmdur til refsingar og greiðslu sakarkostnaðar. Þá var hann krafinn um að greiða konunni þrjár milljónir í miskabætur.

Fréttin hefur verið uppfærð.