Málsvarnarlaun verjenda í hryðjuverkamálinu svokallaða voru ákvörðuð 46 milljónir króna. Er sá kostnaður fyrir vinnu lögmanna Sindra Snæs Birgissonar og Ísidórs Nathanssonar. Sindri mun greiða sex milljónir króna í málskostnað og Ísidór 5,5 milljónir króna, þar sem þeirra hluti í málskostnaðarins er ¼.
Lögmaður Sindra var Sveinn Andri Sveinsson og lögmaður Ísidórs var Einar Oddur Sigurðsson. Málsvarnarlaun hvors um sig voru ákvörðuð 22 milljónir króna en til viðbótar féll til þóknun verjanda Sindra á rannsóknarstigi, Ómars Arnar Bjarnþórssonar, sem var tvær milljónir króna.
Ekki liggur fyrir hver heildarkostnaður vegna héraðssaksóknara eða lögreglu í málinu var.
Sindri hlaut 24 mánaða fangelsisdóm fyrir vopnalagabrot í málinu en var sýknaður af ákæru um skipulagningu hryðjuverka. hann sat í gæsluvarðhaldi frá 13. til 20. september og 22. september til 13. desember 2022. Verður gæsluvarðhaldið yfir Sindra dregið frá refsingu hans.
Ísidór hlaut 18 mánaða fangelsisdóm, líka fyrir vopnalagabrot en var sýknaður af ákæru um hlutdeild í skipulagningu á hryðjuverkum. Gæsluvarðhaldið yfir honum verður einnig dregið frá en hann sat í gæsluvarðhaldi 22. september til 13. desember 2022.
Reiðufé upp á 1.620.000 krónur, þrír þrívíddaprentarar, skotfæri, íhlutir í skotvopnum, verkfæri til vopnagerðar, ýmis tölvubúnaður, rifflarnir AK-47, AR-15 og CZ557 í eigu Sindra voru látin sæta upptöku.
Af eignum Ísidórs sem lagt var hald á við rannsókn málsin sæta upptöku þrívíddarprentari, skotfæri, íhlutir í skotvopn, verkfæri til vopnagerðar, ýmis tölvubúnaður, 7,45 grömm af maríhúana, 0,48 grömm af amfetamíni og 22 stykki af anabólískum sterum.
„Þetta er áfellisdómur fyrir ákæruvaldið,“ sagði Sveinn Andri, lögmaður Sindra, við blaðamenn fyrir utan dómssal eftir að dómurinn var kveðinn upp í gær. Einar Oddur Sigurðsson, lögmaður Ísidórs, tók undir það.
Sýndu enga iðrun
Í dómnum stendur að „við ákvörðun refsingar ákærðu verður litið til þess að um stórfelld vopnalagbrot“ sé að ræða. Kemur einnig fram að þeir hafi „að miklu leyti neitað sök og ekki sýnt neina iðrun. Við matið vegur þungt að ákærðu ráku skipulagða starfsemi og framleiddu órekjanleg og stórhættuleg vopn sem þeir seldu í ágóðaskyni hverjum sem kaupa vildi.“
„Þá hafði ákærði Sindri komið sér upp afar hættulegum vopnum og aukið hættueiginleika fyrrgreinds AR15 riffils verulega með því að gera hann hálfsjálfvirkan, auk þess sem ákærðu reyndu að gera vopnið alsjálfvirkt með svokölluðum swift link búnaði. Vopnalagabrot ákærðu eru stórfelld og fordæmalaus að alvarleika. Til mildunar refsingar horfir hins vegar að þeir hafa játað brot sín að hluta og hafa engan eða takmarkaðan sakaferil.“
Sindri neitaði því staðfastlega að fyrir honum hafi vakað að fremja hryðjuverk og kvaðst ekkert hafa aðhafst sem gæti leitt til þeirrar ályktunar að hann hafi verið í þann mund í fremja slíka árás eða verið að undirbúa slíkt. Í dómnum segir að hann hafi þó illa getað útskýrt ýmsar athafnir sínar sem raktar eru í síðari ákærunni. „Fyrir liggur að ákærði Sindri hafði komið sér upp hættulegum vopnum og breytt einu þeirra í hálfsjálfvirkt skotvopn. Hann hafði einnig undir höndum 100 skota skotgeymi og mikið magn skotfæra. Þá liggur fyrir að ákærðu útbjuggu svokallaðan swift link, sem getur breytt vopninu úr því að vera hálfsjálfvirkt í að vera alsjálfvirkt, sem reyndist að vísu ónothæfur. Ekki er ástæða til að draga í efa skýrslur lögreglu um að vopnið af gerðinni AR-15 hafi verið hálfsjálfvirkt er hald var lagt á það við húsleit á heimili ákærða Sindra. Flestar framangreindar athafnir ákærða áttu sér stað yfir sumarið 2022 og virðist af gögnum málsins sem þær hafi náð ákveðnu hámarki í ágústmánuði. Síðustu tvær vikur fyrir handtöku ákærða virðist þó sem dregið hafi úr samræðum ákærðu sem tengjast sakarefninu.“
Þegar allar forsendur málsins væru skoðaðar leit dómurinn svo á að það hafi verið „ákveðnar líkur að ákærði hafi haft einhvers konar illvirki í huga, þótt ekki liggi nákvæmlega fyrir hvert skotmark hans hefði orðið, hvar eða hvenær.“
Athugasemdir (2)