Staðan í Grindavík verður í brennidepli í Pressu í hádeginu í dag, föstudag. Grindvíkingurinn Pálmi Ingólfsson verður til viðtals en hann á eitt af fyrstu húsunum sem úrskurðuð hafa verið ónýt með öllu eftir jarðhræringar og eldgos í og við Grindavík á síðustu mánuðum. Viðtal við hann birtist einnig í Heimildinni í dag. 

Þegar fjölmiðlum var hleypt inn í Grindavík í byrjun vikunnar fylgdi þeim björgunarsveitarmaðurinn Haraldur Haraldsson, sem þá hafði staðið vaktina lengi. Við spilum viðtal sem tekið var við Harald rétt við hrauntunguna í bænum. 

Auk þeirra verður rætt við Bryndísi Gunnlaugsdóttur, íbúa í Grindavík og fyrrverandi bæjarfulltrúa, sem fékk standandi lófatak á íbúafundi sem haldinn var með ráðamönnum og íbúum í vikunni, þegar hún lýsti því sem vonbrigðum að hafa ekki misst hús sitt undir hraun þegar gaus innan bæjarmarkanna á sunnudag. Ef svo hefði verið hefði hún verið „skorin úr snörunni“ og haft frelsi til að hefja líf á nýjum stað. 

Í síðari hluta Pressu sest Einar Þorsteinsson, nýr borgarstjóri, við umræðuborðið og fer yfir stöðuna í borgarmálunum. Samið var um það við myndun núverandi meirihluta Framsóknarflokks, Samfylkingar, Pírata og Viðreisnar, að Einar tæki við borgarstjórastólnum þegar átján mánuðir væru liðnir af kjörtímabilinu. Enn er sami meirihluti og málefnasamningur í gildi, þótt nýr maður sitji á skrifstofu borgarstjóra.