Mál fimm starfsmanna ferðaþjónustufyrirtækisins Tröllaferða hafa ratað inn á borð til stéttarfélagsins VR og stéttarfélags leiðsögumanna, Leiðsagnar. Meðal umkvartana starfsmannanna er að þeir hafi ekki fengið greidd laun samkvæmt kjarasamningum og að þeim hafi verið meinað að ganga í stéttarfélag leiðsögumanna. Til skoðunar hefur verið að höfða mál fyrir félagsdómi gegn Tröllaferðum vegna meintra brota á lögum um stéttarfélög og vinnudeilur. Þá hefur eitt mál fyrrverandi starfsmanns ratað fyrir dómstóla. Þetta herma upplýsingar Heimildarinnar. 

Tröllaferðir er ferðaþjónustufyrirtæki sem býður upp á alls kyns ferðir hér á landi, meðal annars lengri túra á fjöll og jökla sem og köfunarleiðangra. Félagið er í eigu einkahlutafélags sem Ingólfur Ragnar Axelsson á, en hann stofnaði það árið 2016. Fyrirtækið var með tæplega tveggja milljarða króna tekjur í fyrra og hagnaðist um nærri 112 milljónir króna það …