Katrín Jakobsdóttir forsætisráðherra hafði nýlokið opnunarræðu sinni fyrir málþing um mannréttindakafla stjórnarskrárinnar í Háskólanum í Reykjavík í gær þegar mótmælendur með rauðmálaða lófa á lofti ávörpuðu hana.
„Katrín Jakobsdóttir,“ byrjaði einn mótmælenda – Salka Gullbrá Þórarinsdóttir. „Ef þú lætur þér annt um mannréttindi þá skaltu tala fyrir hönd palestínsku þjóðarinnar fyrir friði.“
Með Sölku voru Margrét Kristín Blöndal og Ólafur Ólafsson en þau voru mætt til þess að láta í sér heyra vegna viðbragða íslenskra stjórnvalda við árásum Ísraelshers á Gasasvæðið. 10.000 manns hafa látið lífið í árásunum sem skollið hafa á Gasasvæðinu undanfarinn mánuð, þar af 4.000 börn.
Fundarstjóri greip inn í ávarp mótmælendanna: „Mig langar til að biðja alla gesti um að setjast niður og hafa ró. Umræður er hægt að taka síðar.“
„Hvenær er hægt að taka þær umræður?“ spurði Margrét þá.
„Þessi fundur er um annað. Hann heldur áfram núna,“ svarði fundarstjórinn.
„Við erum að fara að ræða um mannréttindi,“ sagði maður í salnum.
„Þið eruð að fara að ræða um mannréttindi? Þannig að við þurfum að fara,“ sagði Margrét.
„Gangi ykkur vel með mannréttindin,“ skaut Salka inn í.
Dómarinn og lögfræðingurinn Róbert R. Spanó, einn af frummælendum á málþinginu, þakkaði mótmælendunum fyrir: „Takk fyrir kærlega að iðka tjáningarfrelsi ykkar. Það er mjög mikilvægt.“
Mótmæla vikulega og leyfa ekki vinnufrið
Mótmæli þremenninganna eru ekki þau einu sem sprottið hafa upp að undanförnu vegna átakanna á Gasasvæðinu og þess sem mótmælendur telja skort á ákalli íslenskra stjórnvalda eftir vopnahléi. Hópur mótmælenda hefur mótmælt vikulega fyrir utan ráðherrabústaðinn á meðan ríkisstjórnin fundar þar og gerði hópurinn það síðast í morgun. Þá mættu mótmælendur á málstofu í Háskóla Íslands um gervigreind og mannréttindi í hádeginu í dag og hrópuðu aftur og aftur: „Vopnahlé strax,“ á meðan forsætisráðherra talaði. Mótmælendunum var vísað út að því loknu.
„Þau fá ekki vinnufrið á meðan þau taka ekki skýra afstöðu í þessu máli,“ segir Salka í samtali við Heimildina. Mótmælin í gær voru, að hennar sögn, örþrifaráð vegna „þjóðarmorðs í beinni“ sem íslensk stjórnvöld hafa ekki fordæmt.
„Við erum bara almennir borgarar sem geta eiginlega ekki setið auðum höndum í þessum hörmungum og finnst ríkisstjórnin verða að fordæma þessar viðbjóðslegu hörmungar,“ segir Salka. „Þetta er örþrifaráð almennings – þegar það er ekki nóg að skrifa undir undirskriftalista eða mæta á boðuð mótmæli.“
Ísland sat hjá þegar ályktun um tafarlaust vopnahlé fyrir botni Miðjarðarhafs var samþykkt á neyðarfundi allsherjarþings Sameinuðu þjóðanna í lok október. Sú ákvörðun, sem Bjarni Benediktsson, fyrrverandi fjármálaráðherra og núverandi utanríkisráðherra tók, hefur verið gagnrýnd harðlega. Katrín hefur gefið það út að hún og hennar þingflokkur – Vinstri Græn – hefðu talið rétt að styðja tillöguna.
Athugasemdir (1)