Tilboð Leós til Tómasar: „Ég er líka eiginlega bara sorgmæddur“

„Meinarðu hvort þetta hafi komið mér á óvart? Ég veit ekki hvað ég að segja en jú: Þetta kom mér á óvart,“ segir Eggert Valur Guð­munds­son, fyrr­ver­andi bæj­ar­full­trúi Sam­fylk­ing­ar­innar í Árborg, aðspurður um hvað honum fannst þegar hann sá fréttir af til­boð­inu sem Tómas Ellert Tómasson, fyrr­ver­andi bæj­ar­full­trúi Mið­flokks­ins í Árborg, seg­ist hafa fengið frá fjár­fest­inum Leó Árnasyni árið 2020. Heim­ildin greindi frá mál­inu fyrir helgi. 

Tómas sagði frá því að hann hefði fengið til­boð frá Leó þegar hann var bæj­ar­full­trúi í meiri­hlut­anum á Selfossi árið 2020. Tilboðið gekk út á það, sagði Tómas, að hann og flokkur hans, Mið­flokk­ur­inn, áttu að fá fjár­hags­lega aðstoð í sveita­stjórn­ar­kosn­ing­unum árið 2022 gegn því að hann stuðl­aði að því að sveit­ar­fé­lagið Árborg félli frá kaupum á húsi Lands­bank­ans á Selfossi. Enginn af hinum bæj­ar­full­trú­unum í Árborg, sem voru í meiri­hlut­anum með Tómasi, sögð­ust í grein­inni hafa fengið sam­bæri­leg til­boð og Tómas vegna söl­unnar á Lands­banka­hús­inu. 

Leó neitar að hafa gert Tómasi skil­yrt til­boð um fjár­hags­að­stoð gegn því að fá póli­tíska fyr­ir­greiðslu frá honum. 

Eggert Valur, sem í dag er sveita­stjórn­ar­maður í Rangár­þingi ytra á Suð­ur­landi, seg­ist aldrei hafa séð eða heyrt af slíku til­boði áður. „Ég er odd­viti Rangár­þings ytra og er búinn að vera í sveita­stjórn­ar­málum meira eða minna frá árinu 1998 og þetta er alveg unique fyrir mér. Ég held að það eigi nú við um fleiri í kringum mig sem hafa unnið í þessum geira.“

Heim­ildin greindi frá því fyrr í dag að Tómas hefði verið boð­aður í skýrslu­töku hjá hér­aðs­sak­sókn­ara vegna máls­ins. 

Sigurjón upplifir sorg

Sigurjón Vídalín Guð­munds­son, sem var bæj­ar­full­trúi Á-list­ans en er í dag bæj­ar­full­trúi fyrir Sam­fylk­ing­una, seg­ist hafa orðið mjög undr­andi. „Þetta kom mér veru­lega á óvart; ég átti ekki von á þessu.“

Hann segir við Heim­ild­ina að hann hafi upp­lifi sorg út af mál­inu. „Ég hef alveg upp­lifað það að svona stórir aðilar hafa reynt að þrýsta á mann til að láta mál ganga hratt fyrir sig. Þá gildir að standa í lapp­irnar. Ég var alltaf mjög skýr á því að ekk­ert yrði þvingað í gegnum mig. Ég var nú bæði bara mjög hugsi og ég er líka eig­in­lega bara sorg­mæddur ef þetta er eins og þetta lítur út fyrir að vera. Ef þetta orðið þannig að stórir aðilar séu farnir að bera fé á kjörna full­trúa til að reyna að fá sitt í gegn.“

Helgi ekki alveg eins undrandi 

Helgi Sigurður Har­alds­son úr Fram­sókn­ar­flokknum var ekki alveg eins undr­andi og Eggert Valur og Sigurjón. „Ég eig­in­lega veit það ekki. Já, að hluta til. Kannski með þetta til­tekna dæmi en það kemur ekk­ert á óvart að eitt­hvað svona hafi verið í gangi ein­hvers staðar. Mér kemur ekk­ert á óvart að það sé verið í svona fyr­ir­greiðslu til að reyna að hafa áhrif á kjörna full­trúa. Heim­ur­inn er lít­ill. Svo er spurn­ing hvort farið sé alla leið eða þetta bara reynt. Það eru stórir pen­ingar í húfi, hvort sem það eru lóðir eða aðrar eignir.“

Helgi Sigurður seg­ist furða sig á því að ein­hverjum detti í hug að gera slíkt til­boð og halda að það komi ekki upp á yfir­borðið. 

Ekki náð­ist í Örnu Ír Gunn­ars­dóttur úr Sam­fylk­ing­unni til að fá við­brögð hennar við umfjöll­un­inni. 

Hinir fengu engin tilboð 

Heim­ildin spurði hina bæj­ar­full­trú­ana í þáver­andi meiri­hluta að því í síð­ustu viku, áður en umfjöll­unin um til­boð Leós var birt, hvort þeir hefðu ein­hvern tím­ann fengið sam­bæri­leg til­boð og Tómas  lýsir á sínum ferli í stjórn­málum. Spurning Heim­ild­ar­innar til bæj­ar­full­trú­anna var almenn og var þeim ekki sagt frá máli Tómasar þegar spurn­ingin var borin upp við þá.   

Bæj­ar­full­trú­arnir fjórir sögðu allir nei við þess­ari spurn­ingu. „Ég segi bara nei við spurn­ing­unni hvað mig snertir,“ sagði Eggert Valur  úr Sam­fylk­ing­unni.

Sam­flokks­kona hans, Arna Ír Gunn­ars­dóttir, sagði að slíkt til­boð hafi aldrei verið lagt fyrir hana. „Mig rekur ekki minni til þess og held að ég geti sagt bara nei. Kannski er það út af því að ég er kona og þeir, karl­arnir, hringja minna í konur. Mögulega hefur þetta líka eitt­hvað með það að gera hvaða strauma maður sendir frá sér.“

Sigurjón Vídalín, sagð­ist aldrei hafa fengið boð frá neinum sem snýst um óeðli­lega fyr­ir­greiðslu. 

Helgi Sigurður úr Framsókn tók í sama streng. „Ég hef aldrei upp­lifað slíkt.“ 

Miðað við þetta var Tómas eini bæj­ar­full­trú­inn sem fékk til­boð frá Leó og Sigtúni. Ástæðan fyrir þessu kann meðal ann­ars að liggja í per­sónu­legum tengslum þeirra sem ná ára­tugi aftur í tím­ann en þeir eru æsku­fé­lagar frá Selfossi og fyrr­ver­andi sam­starfs­menn í Sjálf­stæð­is­flokknum.