Fasteignaeigendur sem hafa verið að nýta séreignarsparnað sinn til þess að greiða inn á höfuðstól fasteignalána hafa frest út septembermánuð, eða til og með 30. september, þess að óska eftir framlengingu á úrræðinu út árið 2024.

Ef það er ekki gert mun ráðstöfun séreignarsparnaðarins ekki framlengjast sjálfkrafa, heldur munu umsóknir falla úr gildi frá og með 1. júlí og engar frekari greiðslur berast inn á lán.

Frá þessu er sagt í tilkynningu sem birtist á vef Skattsins í gær. Hægt er að sækja um framlengingu á vef Leiðréttingarinnar.

Fjármálaráðherra minnti á að í dag væri lokadagur

Það að úrræðið renni út og falli úr gildi, ef fólk sækir ekki sérstaklega um framlengingu að fyrra bragði, virðist hafa flogið undir radarinn hjá mörgum. Einnig olli tilkynning Skattsins töluverðum misskilningi, en bæði fjölmiðlar og stjórnmálamenn sögðu frá því að í dag væri lokadagurinn til þess að sækja um framlenginguna.

Bjarni Benediktsson fjármála- og efnahagsráðherra birti til dæmis færslu á Facebook fyrr í dag til þess að minna fólk á að í dag er lokadagur til að framlengja ráðstöfunina og deildi frétt þar sem hið sama kom fram. Hann, rétt eins og fjölmiðlar, hafa nú leiðrétt þann misskilning.

Skatturinn hafðu áður birt tilkynningu um að fólk myndi þurfa að sækja sérstaklega um framlengingu, en þegar hún var birt 14. júní höfðu lögin frá Alþingi sem sett voru 9. júní ekki enn tekið formlega gildi.

Þau hafa hins vegar tekið gildi nú, og búið er að opna vefsíðu þar sem hægt er að sækja um framlengingu úrræðisins.

Snertir ekki þá sem eru með úrræði fyrir fyrstu kaupendur

Tekið skal fram að þetta á einungis við um þá sem eru að láta séreignasparnaðinn renna inn á lán á grundvelli þess almenna úrræðis sem kynnt var til sögunnar árið 2014.

Annað úrræði fyrir fyrstu kaupendur, sem einnig felur í sér ráðstöfun séreignarsparnaðar inn á húsnæðislán, þarf ekki að framlengja. 

Ákveðið að láta kerfið fjara út

Heimildin ræddi framlengingu úrræðisins og nýtingu þess við Sigurð Inga Jóhannsson innviðaráðherra í byrjun maí, en á þeim tímapunkti var verið að vinna frumvarp ráðherrans um framlengingu úrræðisins út næsta ár í þinginu.

Tugþúsundir íslenskra heimila hafa nýtt sér þessa ráðstöfun séreignarsparnaðar inn á höfuðstól húsnæðislána sinna, til þess að grynnka á höfuðstólnum og lækka mánaðarlega greiðslubyrði lána.

Starfshópur um húsnæðisstuðning sem ráðherra skipaði lagði til í fyrra að sett yrði inn sólarlagsákvæði fyrir þetta úrræði. Það felur í sér að úrræðið verður í gildi út næsta ár og svo verður þetta almenna úrræði húsnæðisstuðnings endanlega lagt niður.

Fréttin hefur verið uppfærð og fyrirsögn líka. Í fyrri útgáfu fréttarinnar sagði að í dag væri lokadagurinn til þess að sækja um áframhald úrræðisins. Byggðist það á misskilningi blaðamanns.