Verðbólga á ársgrundvelli lækkar úr 9,5 prósentum niður í 8,9 prósent í júní, en niðurstöður nýrra mælinga á vísitölu neysluverðs voru birtar á vef Hagstofu Íslands í morgun.
Vísitala neysluverðs hækkar um 0,85 prósent frá fyrri mánuði og stendur nú í 595,6 stigum. Vísitala neysluverð, ef húsnæðisliðurinn er ekki tekinn með, hækkar um 0,68 prósent frá því í maí.
Á vef Hagstofunnar segir að kostnaður vegna búsetu í eigin húsnæði, eða reiknuð húsaleiga, hafi hækkað um 1,6 prósent frá fyrri mánuði. Sú breyting hefur áhrif á vísitöluna sem nemur 0,31 prósenti. Verð á þjónustu hótela og veitingastaða hækkaði einnig um 2,7 prósent á milli mánaða, sem hefur áhrif á vísitöluna sem nemur 0,14 prósentum.
Á undanförnum 12 mánuðum hefur vísitala neysluverðs án húsnæðis hækkað um 7,9 prósent, en með húsnæðisliðnum er verðbólgan undanfarna 12 mánuði 8,9 prósent sem fyrr segir. Þetta er í fyrsta sinn frá því seinni part síðasta sumars sem ársverðbólgan dregst saman tvo mánuði í röð.
Verðbólgan umfram væntingar greinenda
Heimildin fjallaði um helgina um nýtt verðbólgumat Veratibus, systurfélags Arev verðbréfafyrirtækis, sem notar eigin verðkannanir og opinber gögn við mat á verðbólgu. Þeirra mat var að verðbólgan myndi lækka úr 9,5 í 8,5 prósent í þessari nýju mælingu Hagstofunnar, og vísitala neysluverðs myndi hækka um 0,6 prósent á milli mánaða.
Peningastefnunefnd Seðlabanka Íslands hækkaði stýrivexti sína um 1,25 prósentustig, upp í 8,75 prósent á síðasta vaxtaákvörðunarfundi sem fór fram 24. maí.
Það var þrettánda vaxtahækkunin í röð, en vextirnir hafa verið hækkaðir til að reyna að koma böndum á verðbólguna. Stýrivextir náðu sögulegu lágmarki í maí 2021, áður en að yfirstandandi vaxtahækkunarferli hófst, en þá voru þeir 0,75 prósent. Stýrivextir voru síðast jafn háir og þeir eru núna í janúar 2010, rúmlega einu ári eftir bankahrunið.
Peningastefnunefnd Seðlabankans mun kynna næstu vaxtaákvörðun sína 23. ágúst næstkomandi, að öllu óbreyttu.
Athugasemdir