Björn Leví Gunnarsson, þingmaður Pírata, furðar sig á kostnaði og vígbúnaði lögreglu fyrir leiðtogafund Evrópuráðsins sem hefst í Hörpu í dag.  

„Nú er verið að halda þennan blessaða fund hérna í Hörpu, allt gott og blessað með það. Okkur var sagt fyrir áramót að það myndu verða 500 milljónir króna aukalega í kostnað út af viðbúnaði lögreglu, en sá kostnaður virðist vera kominn í einhverjar miklu meiri hæðir núna án þess að einhver hafi í rauninni samþykkt það þegar allt kemur til alls,“ sagði Björn Leví undir liðnum störf Alþingis í upphafi þingfundar í dag. 

Leiðtogafundur Evrópuráðsins hefst formlega síðdegis og um 40 leiðtogar Evrópuríkja eru ýmist komnir eða væntanlegir í Hörpu. Þetta er í fjórða sinn í 74 ára sögu Evrópuráðsins sem leiðtogar ríkjanna koma saman á fundi. Fundurinn er sá umfangsmesti sem haldinn hefur verið hér á landi og löggæslan á leiðtogafundinum er af þeirri stærðargráðu sem hefur ekki sést áður á Íslandi. 

Áætlaður kostnaður hins opinbera vegna fundarins er um tveir milljarðar króna og stærstur hluti hans, um 1,2 til 1,4 milljarðar, fer í löggæslu. Nær allt tiltækt lögreglulið mun sinna löggæslu á meðan fundinum stendur. 

„Þegar þinginu er sagt: Þetta mun kosta 500 milljónir aukalega, en kostnaðurinn er síðan miklu meiri, þá er eitthvað skrýtið í gangi,“ sagði Björn Leví. 

Lögreglan að vígbúast í hænuskrefum

En það er ekki það eina sem þingmanninum finnst skrýtið við fyrirkomulag leiðtogafundarins. „Það er líka eitthvað skrýtið í gangi þegar lögreglan er að festa kaup á hríðskotabyssum, ekki bara út af þessum viðburði heldur til að eiga síðan varanlega eftir þennan viðburð. Það hefur einhvern veginn gerst smám saman, í hænuskrefum, að lögreglan er búin að vígbúast. Og til hvers? Fyrir hverja — í alvöru?“ spurði Björn Leví. 

Hann sagði skipulagða glæpastarfsemi hafa verið nefnda sem svarið við vígbúnaði lögreglu, en gaf lítið fyrir þá skýringu. „Gegn hverjum beinist þunginn í skipulagðri glæpastarfsemi? Ekki gegn almennum borgurum, alls ekki. Hann beinist kannski á milli glæpahópa eða eitthvað því um líkt. Almennir borgarar þurfa ekkert að óttast hana.“ 

Björn Leví sagði skipulagða glæpastarfsemi ekki vilja vera í „einhverju stríði við lögregluna“. „Lögreglan á ekkert að vopnast gegn skipulagðri glæpastarfsemi, þess þarf ekki. Það er fullt af öðrum leiðum til að takast á við þann vanda sem við erum að glíma við heldur en að vopnvæðast; vopnvæðast með byssum, með orðræðu og með hræðsluáróðri. Við verðum að gera betur en þetta.“ 

Að mati Björns Levís má það ekki  gerast að Ísland þokist smám saman í átt að vígbúnu samfélagi „sem þjónar í raun bara fólki sem fær einhverja öryggistilfinningu við að sjá vopnaða lögreglu og finnst hún vera að starfa fyrir sig“.   

„En það eru rosalega margir í þeim sporum að finnast lögreglan ekki starfa fyrir sig og slíkum vígbúnaði lögreglu fylgir ekki öryggistilfinning fyrir það fólk,“ sagði Björn Leví á Alþingi í dag.