„Í þessu sameinast mjög margt. Þetta er gríðarlega mikil saga, stjórnmál, slúður, lífsstíll og tíska. Þetta er fólk. Þetta er rosa margt í einum pakka,“ segir Anna Lilja Þórisdóttir, fréttamaður á RÚV og einn fremsti konungssinni landsins, um áhuga sinn á bresku konungsfjölskyldunni.
Karl III verður krýndur konungur Bretlands við hátíðlega athöfn á morgun, laugardag, og mun Anna Lilja lýsa athöfninni í beinni útsendingu í sjónvarpi allra landsmanna. Hún er mjög spennt en þetta er í fyrsta sinn sem hún lýsir konunglegri athöfn. „Þetta er stórmerkilegur viðburður, það er gaman að fá að upplifa þetta. Það eru 70 ár frá síðustu krýningu.“
„Vissulega er þetta gamall karl, en hann getur líka verið boðberi nýrra tíma.“
Karl varð konungur um leið og móðir hans, Elísabet II, féll frá í september í fyrra. Anna Lilja segir embættistíð hans fara vel af stað. „Hann er náttúrlega með eindæmum vel undirbúinn og hefur haft nægan tíma til að ákveða hvernig kóngur hann vill vera, lengri tíma en allir aðrir sem hafa verið á undan honum.“
Karl verður konungur
Anna Lilja hefur hitað upp fyrir krýninguna með þáttum um Karl á Rás 1 síðustu föstudaga, Karl verður konungur, þar sem hún ræðir við fólk úr ýmsum áttum um athöfnina, stemninguna og konungsveldið. Í einum þættinum má heyra áhugaverðar umræður Guðnýjar Óskar Laxdal, sem heldur úti samfélagsmiðlinum Royal Icelander, og Boga Ágústssonar fréttamanns, sem lýsir sér sem andkonungssinna. Anna Marsibil Clausen, ritstjóri hlaðvarpa á RÚV, sér um framleiðslu þáttanna, sem eru gæddir lífi með hljóðbrotum og nútímalegri tónlist í konunglegum búningi.
Hugmyndina að þáttunum fékk Anna Lilja þegar hún var í stuttu fríi. „Mér leiddist og fékk þessa hugmynd,“ segir hún og hlær. Hugmyndin féll í góðan jarðveg og Anna Lilja kann vel við hlaðvarpsformið þar sem hún getur kafað dýpra en í hefðbundnum fréttaflutningi. „Sumir afgreiða konungsfjölskylduna sem eitthvað yfirborðskennt, að einhverju leyti er þetta það, en þetta er gríðarlega merkileg stofnun sem á sér langa sögu.“
Á eftir að velja krýningarbolla
En Anna Lilja þarf að færa fórnir til að lýsa krýningunni í beinni. „Ég er í félagsskap sem heitir Konunglegi klúbburinn, við erum sex konur sem höfum mikinn áhuga á konunglegum málefnum, við verðum með samkvæmi sem ég get ekki mætt í.“ Klúbburinn mun fylgjast með Önnu Lilju lýsa krýningunni og drekka úr konunglegu bollastelli. Sjálf á Anna Lilja eftir að velja hvaða konunglega bolla hún ætlar að taka með sér í útsendinguna. „Það er úr mörgu að velja. Ég á ýmislegt. Ég á til dæmis nýja bolla sem voru framleiddir í tilefni af krýningunni. Ég á helling af Karls- og Díönudóti, Elísabetardóti, bolla með afa Karls og ömmu, langafa hans og langömmu, langalangafa og langalangömmu. Ég þarf að velta þessu fyrir mér. Svo á ég ótrúlega skemmtilegan bolla með mynd af Karli þegar hann kom til Íslands árið 1975.“
En við hverju má búast í krýningarathöfninni sjálfri?
„Krýningin verður talsvert styttri en hjá mömmu hans, þá var hún fimm tímar, núna er miðað við tvo og hálfan, held ég. Það má búast við skrautsýningu. Við erum að fara að sjá kórónur, veldissprota og gullvagninn sem er bara notaður við krýningar. Með því að halda svona viðburði eru þau að réttlæta tilveru sína. Á öllum svona stórviðburðum aukast vinsældir þeirra.“
Anna Lilja er sömuleiðis spennt að fylgjast með hvernig Karli mun vegna í embætti, starfi sem hann hefur beðið eftir alla sína ævi. „En það má ekki alltaf tengja allt við aldur. Vissulega er þetta gamall karl, en hann getur líka verið boðberi nýrra tíma.“
Allt af létta
„Við vorum svolítið eins og munaðarleysingjar“
Kókómjólk á tilboðsverði af allt öðrum ástæðum
Ekki allir sem geta sagst hafa unnið Magnus Carlsen
„Fullkomlega ónothæft hugtak“
Telur sönginn ekki hafa haft úrslitaáhrif
Athugasemdir