„Ég studdi frumvarpið eftir aðra umræðu og hefði gert það sama eftir þriðju hefði ég verið á landinu.“ Þetta segir Katrín Jakobsdóttir forsætisráðherra og formaður Vinstri grænna í skriflegu svari við fyrirspurn Heimildarinnar.
Umdeilt útlendingafrumvarp Jóns Gunnarssonar dómsmálaráðherra var samþykkt fyrir rúmri viku síðan. Alls samþykktu 38 þingmenn frumvarpið, þar af 13 þingmenn Sjálfstæðisflokksins, 12 þingmenn Framsóknarflokksins, sex þingmenn Vinstri grænna, sex þingmenn Flokks fólksins og einn þingmaður Miðflokksins. 15 sögðu nei og 10 voru fjarverandi, þar á meðal forsætisráðherra sem var í opinberum erindagjörðum í Úkraínu.
Heimildin spurði í fyrirspurn sinni hvað Katrínu fyndist um lokaútgáfu frumvarpsins þar sem hún var fjarstödd í atkvæðagreiðslunni. Hún var einnig spurð hvað hún segði um þá gagnrýni sem kom fram á frumvarpið, meðal annars að verið væri að skerða réttindi fólks sem hingað leitar að hæli og til þess fallið að vekja tortryggni í garð flóttafólks og að breytingarnar sem VG gerði á frumvarpinu væru áhrifalitlar og til skrauts fyrir flokkinn.
Enn fremur var hún spurð hvað hún segði um gagnrýni á Vinstri græn í kjölfar þess að flokkurinn samþykkti frumvarpið, sem meðal annars hefur komið úr röðum félagsmanna og ungliðahreyfingunni.
Skilur að málin séu umdeild
Forsætisráðherra segir í svarinu að útlendingafrumvarpið sem samþykkt var sé ekki sama frumvarp og kynnt var í samráðsgátt í fyrra.
„Þegar frumvarpið var lagt fram höfðu verið gerðar á því veigamiklar breytingar að kröfu Vinstri grænna og raunar hafa breytingar sem gerðar hafa verið á málinu síðan verið að tillögu þingmanna VG til þess að bregðast við umsögnum, tryggja réttarvernd og gera málið betra fyrir fólk á flótta auk tillögu þingmanna Samfylkingar um meðferð mála fylgdarlausra barna. Ég skil vel að þessi mál séu umdeild en á landsfundi VG kom eigi að síður fram yfirgnæfandi stuðningur við þingmenn hreyfingarinnar og ráðherra,“ skrifar hún í svari til Heimildarinnar.
Varaþingmaður kveður flokkinn
Heimildin greindi frá því að Daníel E. Arnarson varaþingmaður Vinstri grænna hefði sagt sig úr flokknum nokkrum mínútum eftir að þingmenn flokksins kusu með útlendingafrumvarpinu. „Því miður þá get ég ekki staðið á bakvið hreyfingu sem samþykkir skerðingu á réttindum til eins viðkvæmasta hóp samfélagsins,“ sagði hann.
Einnig hefur framkvæmdastjórn Ungra Vinstri grænna gagnrýnt þingmenn flokksins en í yfirlýsingu frá stjórninni sagðist hún harma það að útlendingafrumvarp dómsmálaráðherra hefði fengið samþykki Alþingis. „Þingmenn sem greiddu atkvæði með frumvarpinu mega bera skömm fyrir.“
Hefði ekki stutt framvarpið í upphaflegri mynd
Einn þingmaður VG, Jódís Skúladóttir, hefur verið áberandi í vörnum gegn gagnrýni á flokkinn varðandi frumvarpið. Hún sagði meðal annars um atkvæðagreiðsluna að hún hefði ekki getað stutt frumvarpið í upphafi þegar hún settist á þing og þakkaði hún allsherjar- og menntamálanefnd fyrir samstarfið.
„Okkur hefur tekist vel að vinna málið. Við erum ekki öll sammála en ég í sannfæringu minni trúi því að við séum hér að afgreiða mál sem er flókið en við erum að gera rétt með því að segja já í dag. Það er búið að vinna málið gríðarlega vel, miklu betur og lengur en nokkurt annað mál sem ég hef komið að í þessu þingi. Við höfum fengið fjölmarga gesti og orðið hefur verið við beiðnum sem komu fram í umsögnum. Mörgum þeirra hefur verið svarað og brugðist við og fyrir það er ég ákaflega þakklát og ég þakka nefndinni fyrir gott samstarf,“ sagði Jódís.
Hún sagðist, þegar hún gerði grein fyrir atkvæði sínu, vera ofsalega stolt af því að VG hefði komið breytingum í gegn og þess vegna segði hún að sjálfsögðu já.
Athugasemdir