Rússneski stjórnarandstöðuleiðtoginn Alexei Navalny hefur birt á Twitter heróp sitt til Rússa (og annarra) um að berjast gegn árásinni á Úkraínu.

Svo hljóðar það:

„Við — Rússar — viljum vera þjóð friðar. En því miður myndu fáir kalla okkur það núna.

En við skulum að minnsta kosti ekki verða þjóð af hræddu þöglu fólki. Þjóð af raggeitum sem þykjast ekki taka eftir árásarstríðinu gegn Úkraínu sem hleypt var af stað af okkar augljóslega vitskerta keisara.

Ég get ekki, vil ekki og mun ekki þegja yfir því að einhver uppdiktuð þvælusaga síðustu 100 ára sé notuð sem afsökun fyrir Rússa til að drepa Úkraínumenn og fyrir Úkraínumenn til að drepa Rússa í varnarskyni.

Það er komið fram á þriðja áratug 21. aldar og við horfum í sjónvarpinu á fólk brenna í skriðdrekum eða sundursprengdum húsum. Við horfum á alvöru ógnanir um að hefja kjarnorkustríð í sjónvarpinu.

Sjálfur er ég frá Sovétríkjunum. Ég fæddist þar. Og einn aðalfrasinn úr barnæsku minni var „Berjist fyrir friði“. Ég heiti á alla að fara. nú út á götu og berjast fyrir friði.

Pútin er ekki Rússland. Og ef það er eitthvað í Rússlandi sem við getum verið stolt af þá eru það þær 6,824 manneskjur sem voru handteknar af því — alveg af sjálfsdáðum — fóru þær út á götu með skilti þar sem stóð „Ekkert stríð“.

Sumir segja að þeir sem ekki geta sjálfir tekið þátt í mótmælafundum og ekki hætt á að lenda sjálfir í fangelsi geti ekki hvatt aðra til þess. Ég er nú þegar í fangelsi svo ég held ég geti það.

Við getum ekki beðið lengur. Hvar sem þú ert, í Rússlandi, Belarús eða hinum megin á hnettinum, farðu á aðaltorgin í bænum þínum og klukkan tvö um helgar. 

Ef þú ert erlendis farðu að rússneska sendiráðinu. Og ef þú getur skipulagt mótmælafund, gerðu það um helgar. Og já, kannski koma bara örfáir fyrsta daginn. Og kannski enn færri þann næsta.

En við verðum að bíta á jaxlinn, yfirvinna óttann og stíga fram og krefjast þess að endir verði bundinn á stríðið. Í staðinn fyrir hvern þann sem er handtekinn verða að koma tveir nýir.

Ef við þurfum að fylla fangelsin og lögreglubílana með okkur sjálfum til að stöðva stríðið, þá skulum við fylla fangelsin og lögreglubílana með okkur sjálfum.

Allt kostar og nú, vorið 2022, verðum við að borga uppsett verð. Enginn mun gera það fyrir okkur. Við skulum ekki „vera á móti stríðinu“. Við skulum berjast gegn stríðinu.“