Hér verður eingöngu spurt um rithöfunda af margvíslegu tagi. Eftirnöfn þeirra duga í öllum tilfellum, nema náttúrlega ef einhverjir skyldu íslenskir vera.

Og fyrri aukaspurning sýnir einmitt rithöfund. Hver er á myndinni fyrir ofan?

***

Aðalspurningar:

1.  Rithöfundur einn byrjaði sögu á þessa leið: „Als Gregor Samsa eines Morgens aus unruhigen Träumen erwachte, fand er sich in seinem Bett zu einem ungeheueren Ungeziefer verwandelt.“ Hvaða höfundur var þetta?

2.  Gone Girl hét sálfræðitryllir sem kom út árið 2013 og fór sannarlega sigurför um heiminn og vinsæl bíómynd var gerð eftir sögunni. Hvað heitir höfundurinn?

3.  Barátta mín — það var nafnið á bók sem út kom 1925 og vakti ekki mjög mikla athygli þá, en hins vegar fór seinna svo að öll brúðhjón í landi höfundarins fengu bókina að gjöf frá ríkinu. Og höfundurinn varð múltimilli á öllum höfundarlaununum. Hver skrifaði bókina?

4.  En Barátta mín var líka nafn á langri sjálfsævisögu sem norskur höfundur gaf út í mörgum þykkum bindum fyrir rúmum áratug. Hvað heitir sá höfundur?

5.  Árið 1969 fékk írskur höfundur Nóbelsverðlaun og í meðfylgjandi texta Nóbelsnefndar sagði að hann fengi verðlaunin fyrir skrif sem „upphefja á nýstárlegan hátt í bæði skáldsögum og leikhúsverkum bjargarleysi nútímamannsins“. Hvaða höfundur var þetta?

6.  Annar höfundur sem fékk Nóbelsverðlaunin um miðjan sjötta áratuginn var af Nóbelsnefndinni sagður fá verðlaunin fyrir fjörlega og kröftuga sagnalist sem hafi endurnýjað hina miklu sagnahefð heimalands hans. Hver var sá?

7.  Höfundur nokkur vakti fyrst athygli þegar hún skrifaði smásögu um móður sem vill allt fyrir börnin sín gera og sker að lokum úr sér hjartað fyrir þau. Síðar skrifaði hún bæði skáldsögur og leikrit og tók virkan þátt í stjórnmálum um skeið, sat meira að segja á Alþingi. Hvað hét hún?

8.  Cormoran Strike heitir aðalpersónan í flokki glæpasagna eftir Robert nokkurn Galbraith. Út eru komnar fimm bækur um Strike en höfundurinn segist hafa tilbúið efni í tíu til viðbótar. Bækurnar þykja alveg prýðilegar en það er þó raunverulegt nafn höfundarins sem hefur vakið mesta athygli á þeim. Hver leynist bak við nafnið Robert Galbraith?

9.  Árið 1983 kom út smásagnasafnið Tíu myndir úr lífi þínu, sögur um þykjustuleiki og alvörudrauma. Höfundur hefur síðan aðallega skrifað skáldsögur, svo sem Z-Ástarsögu, Stúllkuna í skóginum, Þögnina, Frá ljósi til ljóss og Þegar stjarna hrapar. En líka Dísusögu og Systu - bernskunnar vegna. Hver er höfundurinn?

10.  Árið 1973 kom út bók um stúlku eina sem olli íbúum í heimabæ sínum alls konar hörmungum og skaða — en þeir áttu það líka flestallir skilið, helvítin þau arna! Höfundurinn hefur síðan verið einn sá afkastamesti í heiminum. Hvað heitir hann?

***

Seinni aukaspurning:

Á myndinni hér að neðan má sjá konu eina, fædda 1845, sem var sannkallaður brautryðjandi í skáldskap í landi sínu og ekki aðeins af konu að vera. Hvað heitir hún?

***

Svör við aðalspurningum:

1.  Franz Kafka.

2.  Gillian Flynn.

3.  Adolf Hitler.

4.  Knausgaard.

5.  Beckett.

6.  Halldór Laxness.

7.  Svava Jakobsdóttir.

8.  Rowling.

9.  Vigdís Grímsdóttir.

10.  Stephen King.

***

Svör við aðalspurningum:

Á efri myndinni er ástarsagnahöfundurinn Barbara Cartland.

Á neðri myndinni er Torfhildur Hólm.