Fyrirtækið Origo setti yfir 50 starfsmenn sína á hlutabótaleið stjórnvalda sama dag og tilkynnt var um 425 milljóna króna hagnað á fyrsta ársfjórðungi. Fyrirtækið segir aðgerðina ná til þjónustu og vöruþróunar fyrir ferðaþjónustuna, en Icelandair er stærsti viðskiptavinur fyrirtækisins á því sviði.
Stjórn Origo ákvað að fella niður arðgreiðslur og kaupa ekki eigin hlutabréf vegna ástandsins. Stjórnendur Origo munu taka á sig launaskerðingu á meðan úrræði stjórnvalda eru nýtt, að því er kemur fram í svari fyrirtækisins við fyrirspurn Stundarinnar. Laun Finns Oddssonar, forstjóra Origo, munu lækka um 15 prósent, laun framkvæmdastjóra um 10 prósent og laun millistjórnenda um 5 prósent á meðan úrræði stjórnvalda nýtur við.
Tilkynnt var á fimmtudag um að Finnur muni hætta hjá Origo og taka við starfi forstjóra Haga. Laun Finns námu 6,2 milljónum króna á mánuði í fyrra, að meðtöldum hlunnindum og lífeyrisgreiðslum, og höfðu hækkað um 29 prósent á milli ára. Má því áætla að tekjur hans eftir skerðingu verði tæpar 5,3 milljónir króna á mánuði, eða tæpri hálfri milljón hærri en þau voru árið 2018.
Á miðvikudag í síðustu viku tilkynnti Origo um 425 milljóna króna hagnað á fyrsta ársfjórðungi. Er það tvöfalt meiri hagnaður en á sama ársfjórðungi í fyrra. Þá námu arðgreiðslur vegna ársins 2018 einum milljarði króna.
„Fjárhagsstaða Origo er því áfram mjög sterk“
Finnur sagði í tilkynningu að þegar hefði verið tekið tillit til niðurfærslu viðskiptakrafna vegna þeirrar efnahagslegu óvissu sem stafar af COVID-19 faraldrinum. „Fjárhagsstaða Origo er því áfram mjög sterk og félagið vel í stakk búið til að kljást við rekstraróvissu og mögulega ágjöf á næstu mánuðum og misserum,“ var haft eftir honum í tilkynningunni. „Við horfum hins vegar til þess að upplýsingatækni er ein af þeim undirstöðum sem heldur íslensku samfélagi eins vel virkandi og raun ber vitni og að vegna faraldursins mun vægi upplýsingatækni og stafrænna lausna aukast frekar en hitt. Þar er Origo í lykilstöðu til að nýta tækifærin og horfum við því hóflega bjartsýn til framtíðar.“
Sama dag og tilkynnt var um afkomu fyrsta ársfjórðungs voru yfir 50 starfsmenn Origo settir í skert starfshlutfall í samræmi við hlutabótaleið ríkisstjórnarinnar. Munu þeir fá greiðslur úr ríkissjóði í gegnum Vinnumálastofnun til að mæta launaskerðingunni.
Nær 100 prósent tekjutap viðskiptavina
Í svari við fyrirspurn Stundarinnar staðfestir Gísli Þorsteinsson, markaðsstjóri Origo, að á bilinu 50 til 60 starfsmenn, eða yfir 10 prósent allra starfsmanna fyrirtækisins, fari í skert starfshlutfall frá og með maí. Ástæðan sé samdráttur í þjónustu og vöruþróun fyrir ferðaþjónustuna. „Að auki taka stjórnendur á sig skerðingu launa á meðan úrræði stjórnvalda eru nýtt,“ segir í svarinu. „Origo hefur stigið það skref að nýta hlutastarfaleið á þeim sviðum sem hafa orðið fyrir hvað mestum áhrifum vegna samdráttar í eftirspurn eftir þjónustu eða ferðatengdum lausnum. Markmiðið er að verja störf í lengstu lög og forðast uppsagnir ef hægt er.“
„Að auki taka stjórnendur á sig skerðingu launa á meðan úrræði stjórnvalda eru nýtt“
Í svarinu kemur fram að Origo hafi fundið fyrir niðursveiflunni síðustu vikur. „Nokkrir stórir viðskiptavinir Origo starfa í ferðaþjónustu og hafa orðið fyrir nánast 100% tekjusamdrætti vegna COVID-faraldursins, t.d. flugfélög, hótel og bílaleigur. Viðskiptavinir hafa leitað eftir stuðningi Origo til að takast á við þessar ögrandi aðstæður, m.a. með hagræðingu og samdrætti í starfsemi. Icelandair er stærsti viðskipavinur Origo í ferðaþjónustu.“
Finnur Oddsson, fráfarandi forstjóri, var fjórði launahæsti forstjóri fyrirtækjanna í Kauphöllinni í fyrra. Eins og áður segir námu laun hans, auk hlunninda og lífeyrisgreiðslna, 6,2 milljónum króna á mánuði árið 2019. Hann hækkaði um 29 prósent í launum á milli ára, en laun hans árið 2018 voru 4,8 milljónir króna á mánuði. Arðgreiðslur til hans árið 2018 námu 3,3 milljónum króna.
Fagna aðgerðum í þágu nýsköpunar og nýrra starfa
Í aðgerðapakka ríkisstjórnarinnar, sem kynntur var 21. apríl, var kveðið á um sérstaka áherslu á frumkvöðla- og nýsköpunarstarfsemi með 4,4 milljarða króna aukningu fjárframlags. Þannig verður veitt 1,1 milljarði króna í nýsköpunarstjóðinn Kríu. Endurgreiðslur vegna rannsóknar og þróunar verða auknar úr 20 prósentum í 25 prósent. Þak á endurgreiðslum er jafnframt hækkað úr 600 milljónum króna í 900 milljónir króna.
Þessum aðgerðum fögnuðu fjórir stjórnendur íslenskra nýsköpunarfyrirtækja í grein í Fréttablaðinu á þriðjudag í síðustu viku. Var Finnur einn höfunda. „Aðgerðir stjórnvalda nú skapa rétta hvata og auka líkurnar á því að hér á landi byggist upp fleiri burðug hugverkafyrirtæki, með tilheyrandi fjölgun starfa og verðmætasköpun,“ skrifuðu stjórnendurnir. „Aðgerðir ríkisstjórnarinnar eru fjárfesting í fólki, hugviti og þekkingu og öflug virkjun á sköpunarkrafti Íslendinga sem hefur svo oft reynst vel á erfiðum tímum. Aðgerðirnar koma til með að gera íslenska hagkerfið samkeppnishæfara á alþjóðavettvangi en það sem skiptir þó líklega mestu máli er að hvatarnir sem aðgerðirnar mynda munu leiða til nýrra verkefna á Íslandi, nýrra fyrirtækja, nýrra starfa, aukinnar fjárfestingar og meiri gjaldeyristekna til framtíðar. Það er því bjart fram undan í nýsköpun á Íslandi. Um það erum við sannfærð.“
Jón Sigurðsson, forstjóri stoðtækjaframleiðandans Össurar, stóð einnig að greininni. Fyrirtækið minnkaði starfshlutfall 165 starfsmanna á Íslandi niður í 50 prósent í apríl í samræmi við hlutabótaleiðina, að því er fram kemur í frétt RÚV. Starfsemi Össurar fer að miklu leyti fram erlendis og er fyrirtækið ekki lengur í íslensku Kauphöllinni. Arðgreiðsla til hluthafa nam um 1,2 milljörðum króna vegna síðasta árs. Fyrirtækið hefur einnig keypt eigin bréf fyrir 1,3 milljarða króna það sem af er þessu ári.
Covid-19
Fleiri smitast af hinni banvænu Nipah-veiru
Heilbrigðisyfirvöld grípa til sóttkvíar eftir Nipah-smittilfelli á Indlandi
Veira dreifist hratt um Evrópu
Sérfræðingar vara við nýjum heimsfaraldri
Suður-Súdan glímir við versta kólerufaraldurinn í 20 ár
Athugasemdir