Fréttir Covid-19

Vinnslustöðin krefst fundar með Katrínu og Bjarna um milljarðs kröfu sína vegna kvóta

Stjórn útgerðarfélagsins Vinnslustöðvarinnar í Vestmanneyjum tók ákvörðun um að krefjast fundar með stjórnvöldum um niðurstöðu í makrílmálinu. Á meðan heldur útgerððin til streitu tæplega milljarðs króna skaðabótakröfu sinni gegn Íslenska ríkinu, segir Sigurgeir Brynjar Kristgeirsson, framkvæmdastjóri Vinnslustöðvarinnar og einn af hluthöfunum.

Ingi Freyr Vilhjálmsson

28. apríl 2020 · 11:20

Birtist upphaflega í Stundinni fyrir 7 árum.

Vinnslustöðin Í Vestmannaeyjum hefur óskað eftir fundi með stjórnvöldum til að reyna að ná sáttum um skaðabótakröfu útgerðarfélagsins í makrílmálinu. Þar til annað verður ákveðið mun Vinnslustöðin halda skaðabótakröfu sinni upp á 982 milljónir króna gegn ríkinu til streitu. Þetta segir Sigurgeir Brynjar Kristgeirsson, framkvæmdastjóri Vinnslustöðvarinnar. Náist ekki sættir við ríkið mun skaðabótamál Vinnslustöðvarinnar verða útkljáð fyrir dómstólum á næstu árum.

Fimm af sjö útgerðarfélögum sem stefndu ríkinu og kröfðu íslenska ríkið um samtals rúmlega 10 milljarða króna skaðabætur út af makrílúthlutun hafa fallið frá kröfugerð sinni á hendur vegna efnahagsafleiðinga COVID-faraldurssins. Kröfugerðin vakti hörð þverpólitísk viðbrögð og sagði Bjarni Benediktsson fjármálaráðherra til dæmis að kvótakerfi Íslendinga væri ekki „náttúrulögmál“ þegar málið kom upp fyrr í apríl og ýjaði að því að hægt væri að breyta kvótakerfinu.

„Orð eru til alls fyrst“

Þó skýringar útgerðarfélaganna fimm um að falla frá skaðabótakröfunum hafi eingöngu lotið að COVID-faraldrinum verður að teljast líklegt að á bak við liggi flóknari skýringar eins og til dæmis þær að fá ekki alla stjórnmálaflokka landsins upp á móti sér, meðal annars formenn ríkisstjórnarflokkanna.

Ekkert svar borist segir Sigurgeir

Vinnslustöðin og Huginn frá Vestmannaeyjum hafa hins vegar sagt að þær ætli að halda skaðabótakröfum sínum til streitu.

„Ég er búinn að óska eftir fundi með forsætis-, fjármála- og samgönguráðherra,“ segir Sigurgeir Brynjar, sem yfirleitt er kallaður Binni í Vinnslustöðinni, í samtali við Stundina. „Niðurstaða okkar á stjórnarfundi var sú að hætta ekki við þetta að svo stöddu heldur óska eftir fundi með forsvarsmönnum stjórnvalda og fara yfir stöðuna,“ segir hann.

Aðspurður um hvort einhugur hafi verið um málið í stjórn Vinnslustöðvarinnar að fara þessa leið segir Sigurgeir Brynjar að „meirihluti stjórnar“ hafi tekið þessa ákvörðun.

„Við höfum óskað eftir þvi að hitta stjórnvöld en það hefur ekkert svar borist við því“

Hann segir að í þessari ákvörðun felist ekki endanleg niðurstaða stjórnar Vinnslustöðvarinnar um halda skaðabótakröfunni til streitu heldur felst í ákvörðuninni að útgerðin vilji ræða við stjórnvöld á fundi fyrst og sjá svo til hvað setur eftir þann fund.

Sigurgeir Brynjar segir að Vinnslustöðin hafi frá byrjun leitað sátta í málinu en að engin svör hafi komið frá ríkinu. „Við buðum sættir í málinu þegar lagasetningin var gerð á sínum tíma og höfum alltaf boðið sættir. En við höfum aldrei fengið boð um neinar sættir. Orð eru til alls fyrst. Við höfum óskað eftir þvi að hitta stjórnvöld en það hefur ekkert svar borist við því,“ segir Sigurgeir Brynjar.

Hann segir að ákvörðunin um að höfða málið hafi verið tekin á stjórnarfundi og að hún hafi ekki verið „tekin út í loftið“ og að ákvörðun um að hætta við málið verði sömuleiðis tekin með ígrunduðum hætti ef svo verður.

Kaupfélagið næst stærsti hluthafinn

Vinnslustöðin er í eigu eignarhaldsfélagsins Seilar ehf., útgerðararms Kaupfélags Skagfirðinga FISK Seafood, Lífeyrissjóðs Vestmannaeyja og fjölmarga lítilla hluthafa. Seil og FISK Seafood er langstærstu hluthafarnir með 40,89 prósent og 32,88 prósent.

FISK eignaðist hlutinn í Vinnslustöðinni árið 2018 þegar félagið keypti hlutabréfin af Guðmundi Kristjánssyni sem kenndur er við Brim. Í fyrra keypti Guðmundur svo hlutabréf sem FISK Seafood hafði keypt í Brimi, áður HB Granda, af lífeyrissjóðnum Gildi. FISK Seafood og Guðmundur Kristjánsson hafa því átt í stórum viðskiptum innbyrðis á liðnum árum. Guðmundur og Vestmannaeyingarnir í hluthafahópi Vinnslustöðvarinnar, sem Sigurgeir Brynjar Kristgeirsson fer fyrir, höfðu átt í áralöngum deilum og málaferlum um stjórn félagsins. Með viðskiptunum við FISK Seafood var skorið á þann hnút sem oftsinnis hafði verið fjallað um í fjölmiðlum.

Kaupfélag Skagfirðinga, í gegnum FISK Seafood, mun því njóta góðs af því með óbeinum hætti í gegnum hlutabréfaeign sína í Vinnslustöðinni ef svo fer á endanum að útgerðin í Eyjum fær skaðabætur frá íslenska ríkinu.