Kolbrún Baldursdóttir, borgarfulltrúi Flokks fólksins, vill að Félagsbústaðir felli niður leigu í tvo til þrjá mánuði vegna COVID-19 faraldursins. Þá verði allar innheimtuaðgerðir á vegum Félagsbústaða stöðvaðar.

Kolbrún lagði fram tillögur þess efnis á fundi borgarráðs í gær, en afgreiðslu þeirra var frestað. Ein tillagnanna var jafnframt að innheimta ekki gjöld fyrir skóla- eða frístundavist eða nokkuð annað sem börn hafa ekki getað mætt í að fullu vegna komu COVID-19. „Borgarfulltrúi telur að skóla- og frístundayfirvöld borgarinnar eigi að taka sjálfstæða ákvörðun um að innheimta ekki gjöld fyrir skóla- eða frístundavist án tillits til hvaða álit eða skoðun Samtök sveitarfélaga á höfuðborgarsvæðinu hafa á því, eða önnur sveitarfélög á höfuðborgarsvæðinu ef því er að skipta,“ segir í tillögunni. „Reykjavíkurborg er stærsta sveitarfélagið og eiga yfirvöld að hafa kjark til að ríða á vaðið með ákvörðun eins og þessa og gefa þar með gott fordæmi. Börn eru ekki að fullnýta pláss sín vegna samkomubanns.“

Að öðru leyti snéru tillögur Kolbrúnar að Félagsbústöðum, sem reka hátt á þriðja þúsund félagslegra íbúða fyrir leigjendur sem ekki hafa tök á að sjá sér fyrir húsnæði vegna lágra launa, þungrar framfærslu eða annarra félagslegra aðstæðna. Vill hún að leiga verði felld niður í tvo til þrjá mánuði og jafnframt skoðað að veita aukna greiðslufresti. „Fordæmi um aðgerðir af þessu tagi eru nú þegar til hjá öðru leigufélagi,“ segir í tillögunni. „Reikna má með að fjölmargir eigi eftir að verða fyrir barðinu af veiruvánni og þá ekki síst fjárhagslega. Fólk verður fyrir tekjumissi á næstu vikum og mánuðum vegna ástandsins. Hjá Félagsbústöðum leigir viðkvæmur hópur og margir berjast í bökkum fjárhagslega. Í þeim aðstæðum sem nú ríkja er mikilvægt að létt verði áhyggjum af fólki eins og hægt er.“

„Í þeim aðstæðum sem nú ríkja er mikilvægt að létt verði áhyggjum af fólki eins og hægt er“

Auk þess lagði hún til að hætt verði að senda leiguskuldir leigjenda Félagsbústaða til lögfræðinga í innheimtu og jafnframt að þær sem nú þegar eru komnar í innheimtuferli verði frystar. „Vitað er að þegar skuld er komin í innheimtu hjá lögfræðingum þá leggjast innheimtugjöld ofan á skuldina. Nú ríkir erfitt ástand hjá mörgum vegna COVID-19 og sýnt þykir að einhverjir munu missa vinnu sína eða mæta öðrum erfiðleikum sem veiruváin veldur fólki og samfélaginu. Mikilvægt er að fyrirtæki eins og Félagsbústaðir sýni sveigjanleika, lipurð og mannlegheit og umfram allt að taka mið af þessum erfiðu aðstæðum sem nú ríkja.“