„Sósíalismi er ekki svarið, hvorki við kóvid, loftslagsbreytingum né fátækt.“ Þetta skrifar Helgi Hrafn Gunnarsson, þingmaður Pírata í Twitter færslu sem vakti athygli á samfélagsmiðlinum í gær. Hann segir mikið um „yfirlætislegt háð og tilraunir til tilfinningakúgunar“ hjá sósíalistum.
Tilefni skrifa Helga Hrafns er viðtal í Mannlífi við stofnanda Sósíalistaflokksins, Gunnar Smára Egilsson, þar sem hann fjallar um erindi flokksins og vonir um að hann nái mönnum á þing í næstu Alþingiskosningum. „Það er frumstæð og ofureinfölduð nálgun á stjórnmál að ætla að stýra samfélaginu samkvæmt einum tilteknum isma,“ skrifar Helgi Hrafn. „Góð samfélagsmódel eru kokkteill úr ýmsum áttum, þ.á.m. sósíalisma, kapítalisma og öðrum.“
Færsla Helga Hrafns hefur fengið mikil viðbrögð á Twitter. Eru Píratar meðal annars sakaðir um að vera hræddir við að hafa pólitíska stefnu. „Það er greinilegt að þú hefur ekki tekið þátt í stefnumótun Pírata,“ svarar Helgi Hrafn þeim Twitter notanda. „Við eigum við allskonar vandamál að stríða eins og allar hreyfingar, en ég get fullvissað þig um að skortur á skoðunum eða stefnumálum eru ekki þar á meðal.“
Í umræðunum hafnar Helgi Hrafn því að kapítalismi sé orsök loftslagsbreytinga. „Loftslagsbreytingar eru samspil iðnvæðingar og skorts á vísindalæsi hjá ráðamönnum alls staðar í heiminum algerlega án tillits til þess hvort þeir hafi ráðið yfir kapítalískum samfélögum eða sósíalískum. Það eru algjör mistök að ætla að leysa loftslagsvandann með sósíalisma.“
„Það eru algjör mistök að ætla að leysa loftslagsvandann með sósíalisma“
Nefnir hann sérstaklega að til sé kapítalísk lausn á loftslagsvandanum, að setja útblásturskvóta á uppboðsmarkað, sem sé tímabundinn og framseljanlegur. „Setja beinlínis verðmiða á andrúmsloftið. Láta það kosta peninga,“ skrifar hann.
Einn viðmælandi Helga Hrafns segir kapítalisma hafa afhjúpað sig sem „isma“ sem hvorki geti leyst efnahagslegar né samfélagslegar krísur. Það sé merki um þráhyggju að gera hlutina eins en búast samt við annarri niðurstöðu „Ég var hvorki að leggja til að gera neitt eins, né býst ég við annarri niðurstöðu en allskyns áföllum og krísum alveg óháð því,“ svarar Helgi. „Hvorki kapítalismi né sósíalismi frelsa oss frá krísum. Veit einungis um eina samfélagsgerð með innbyggða krísustjórnun og það er gerræði. Það eru samt ákveðin hagfræðileg undirstöðuatriði sem hafa (bara víst) reynst vel, þótt það verði alveg áföll, mistök og krísur líka. Lögmálið um framboð og eftirspurn er gott og gilt þótt blöskrunarlegt ábyrgðarleysi í regluverki bankakerfisins geti leitt af sér kerfishrun.“
Jón Gnarr, grínisti og fyrrverandi borgarstjóri, tekur einnig þátt í umræðunum. „Sósíalismi er religjón,“ skrifar hann. „Að reyna að rökræða við sósíalista er eins og að rífast við trúfólk og skilar yfirleitt engu, þau trúa bara því sem þau vilja og alhæfa um það sem þeim sýnist. Kapítalisminn, fyrir þeim er t.d. ekki neitt hyperobject heldur the Matrix en þau eru Neo.“
Helgi Hrafn svarar því svo að hann sé ekki sammála því að það skili yfirleitt engu að rökræða við sósíalista. „Bara tekur tíma eins og rökræður um stóru málin almennt. Mikið um yfirlætislegt háð og tilraunir til tilfinningakúgunar, en það segir meira um samskiptalegan metnað þeirra sem mæla, heldur en málstaðinn sem þau mæla fyrir.“
Athugasemdir