Greint var frá áformum um að hætt verði að senda fjöl­skyldur á flótta aftur til Grikk­lands í tíu­fréttum RÚV í gær­kvöldi.

Ekki er ljóst hvort breyt­ingin nái fram að ganga áður en sex manna fjöl­skylda frá Írak, sem fjallað hefur verið um í fjöl­miðlum, verður flutt úr landi. Í frétt RÚV sagði Ásmundur Einar Daðason barna­mála­ráð­herra að hann von­að­ist til að breyt­ingin kæmi til fram­kvæmda á næstu dögum. 

Hingað til hefur fjöl­skyldum verið synjað um vernd á Íslandi, á þeim grund­velli að þær hafi þegar fengið alþjóð­lega vernd í Grikk­landi sem eigi að tryggja þeim rétt­indi þar. Það hefur samt sem áður ekki komið til þess ennþá að fjöl­skyldur séu sendar úr land, þar sem tíma­frestir hafa liðið áður en til brott­vís­unar hefur komið. Það hefur tryggt þeim fjöl­skyldum efn­is­með­ferð hér. Brott­vísun nokk­urra fjöl­skyldna hefur hins vegar verið yfir­vof­andi. 

Und­an­farna daga og vikur hafa æ fleiri ein­stak­lingar og sam­tök skorað á íslensk stjórn­völd að veita fjöl­skyldum sem hafa fengið alþjóð­lega vernd í Grikk­landi en hafa engu að síður flúið hingað, vernd hér á landi í stað þess að senda þær aftur til baka. Það hefur Rauði kross­inn á Íslandi raunar gert lengi. Það gerðu síð­ast sam­tökin Barna­heill í gær, en þau vinna að rétt­indum og vel­ferð barna með barna­sátt­mála Sam­ein­uðu þjóð­anna að leið­ar­ljósi. „Að marg­gefnu til­efni skora Barna­heill – Save the Children á Íslandi á íslensk stjórn­völd að fram­fylgja lögum til að tryggja að börnum, sem hingað til lands koma og leita eftir alþjóð­legri vernd, við­un­andi með­ferð mála,“ segir þar meðal ann­ars og vitnað í Barna­sátt­mál­ann, sem íslensk stjórn­völd eru bundin af. 

Í nokkrum til­vikum hefur brott­vísun verið frestað eða gerðar breyt­ingar á reglu­gerðum, í því miði að bregð­ast við ein­staka málum sem hafa hlotið athygli í fjöl­miðlum. Skemmst er að minn­ast máls Zainab Safari, nem­anda í Haga­skóla. Skóla­fé­lagar hennar börð­ust fyrir því að hún fengi að vera á Íslandi. Barátta þeirra og ann­arra varð til þess að reglu­gerð var breytt og fjöl­skyldan fékk að vera. 

Í við­tal­inu á RÚV sagði Ásmundur Einar að aðstæður í Grikk­landi nú köll­uðu á breyt­ingar. „Það eru auð­vitað aðstæður þarna núna, sem að bæði vegna aðstæðna á landa­mær­unum og svo hugs­an­lega kór­óna­víruss­ins, sem gerir það að verkum að það kann að vera ákveð­inn vafi á því að þau séu að njóta þeirrar þjón­ustu sem þau hafa rétt­indi á í Grikk­landi.“