AGS segir sveiflur í rafmyntum ógna fjármálastöðugleika

Þörf er á sam­ræmdu reglu­verki á alþjóða­vísu fyrir raf­myntir svo að þær valdi ekki óstöð­ug­leika á fjár­mála­mark­aði, en sveiflur í virði mynt­anna gæti leitt til mik­illa sveiflna á hluta­bréfa­mark­aði. Þetta kemur fram í grein­ingu frá Alþjóða­gjald­eyr­is­sjóðnum (AGS), sem kom út í vik­unni.

36 prósenta fylgni

Samkvæmt grein­ing­unni hefur fylgni á milli virðis raf­mynta, líkt og Bitcoin og Ether, og S&P 500 hluta­bréfa­vísi­töl­unnar vest­an­hafs auk­ist tölu­vert á síð­ustu árum. Þetta er mikil breyt­ing frá tíma­bil­inu 2017-2019, þar sem engin fylgni var á milli verðs á raf­mynt­unum og hluta­bréfa­verðs. Á síð­ustu tveimur árum jókst fylgnin á milli raf­mynta og hluta­bréfa hins vegar til muna og náði 36 pró­sentum.

Fylgnin gengur í báðar áttir, þ.e. að verð­fall í raf­myntum hefur nei­kvæð áhrif á mark­að­inn og öfugt. AGS segir að sveiflur í virði Bitcoin geti útskýrt þriðj­ung af sveifl­unum í S&P 500 vísi­töl­unni. Aðrar raf­myntir og svo­kall­aðar stöð­ug­leika­myntir (e. stablecoins), sveifl­ast líka í takt við hluta­bréf, en valda þó minni áhrif á mark­að­inn. Stærsta stöð­ug­leika­myntin, Tether, útskýrir um fjögur til sjö pró­sent af sveiflum á banda­rískum hluta­bréfa­mark­aði.

Þörf á regluverki

Gita Gopinath, aðal­hag­fræð­ingur AGS, vakti athygli á grein­ing­unni á Twitter-síðu sinni í gær, en þar segir hún að mikil fylgni í virði Bitcoin við hluta­bréfa­mark­að­inn bendi til þess að fjár­fest­ing í mynt­inni bjóði ekki upp á jafn­mikla áhættu­dreif­ingu og áður var talið.

Þessi mikla fylgni gæti einnig orðið áhættu­söm fyrir stöð­ug­leika fjár­mála­kerf­is­ins, sér­stak­lega í þeim löndum þar sem notkun á Bitcoin er almenn. Eitt þess­ara landa er El Salvador, en líkt og Kjarninn hefur áður fjallað um er raf­myntin þjóð­ar­gjald­mið­ill þar í landi.

Sér­fræð­ingar hjá AGS segja því að nú sé tími til að skapa sam­ræmt og skýrt reglu­verk fyrir raf­myntir á alþjóða­vísu sem rík­is­stjórnir ein­stakra landa gætu notað til að stuðla að fjár­mála­stöð­ug­leika. Slíkt reglu­verk gæti inni­haldið auknar kröfur á þær fjár­mála­stofn­anir sem stunda við­skipti með raf­myntir og aðgerðir til að koma í veg fyrir fulla nafn­leynd þeirra sem nota þær.