Stóra markaðsmisnotkunarmál Landsbankans, sem Hæstiréttur dæmdi í febrúar 2016, mun fá efnismeðferð fyrir Mannréttindadómstóli Evrópu. Ákvörðun um þetta var tekin fyrr í janúarmánuði. Frá þessu er greint í Fréttablaðinu.
Í málinu voru fjórir menn dæmdir til fangelsisvistar fyrir markaðsmisnotkun á tímabilinu 1. nóvember 2007 til 3. október 2008. Samkvæmt ákæru áttu þeir að hafa handstýrt verðmyndun hlutabréfa í Landsbankanum og með því blekkt „fjárfesta, kröfuhafa, stjórnvöld og samfélagið í heild.“
Sigurjón Þ. Árnason, fyrrverandi bankastjóri Landsbankans, Ívar Guðjónsson, fyrrum forstöðumaður eigin fjárfestinga Landsbankans, Júlíus S. Heiðarsson, sem var sérfræðingur í sömu deild, og Sindri Sveinsson, sem starfaði við eigin fjárfestingar hjá Landsbankanum, voru allir dæmdir sekir um markaðsmisnotkun í Hæstarétti. Sigurjón hlaut eins árs og sex mánaða fangelsisdóm. Ívar var dæmdur í tveggja ára fangelsi en Júlíus og Sindri hlutu eins árs fangelsisdóma.
[adspot]Samkvæmt frétt Fréttablaðsins vísuðu þrír mannanna málinu til Mannréttindadómstóls Evrópu sem ætlar að taka það til efnismeðferðar. Dómurinn hefur þegar beint spurningum til íslenska ríkisins um mál kærendanna þriggja, en málareksturinn byggir á því að þeir hafi ekki hlotið réttláta málsmeðferð þar sem hluti þeirra dómara sem dæmdi í málum þeirra í Hæstarétti hefðu tapað fjárhagslega á bankahruninu, og væru þar með hlutdrægir.
Dæmt 2015 og 2016
Dómar í tveimur málum gegn Sigurjóni, stóra markaðsmisnotkunarmáli Landsbankans og Ímon-málinu, féllu upphaflega í október 2015 og í febrúar 2016. Hann hlaut samanlagt fimm ára fangelsisdóm í þeim málum.
Á árinu 2017 var greint frá því að Sigurjón hefði krafist þess að tvö mál á hendur honum yrðu tekin aftur til meðferðar fyrir dómi. Beiðni um þá endurupptöku hafi verið send inn í september 2016. Sigurður G. Guðjónsson, lögmaður Sigurjóns, sagði í samtali við Fréttablaðið á þeim tíma að byggt væri „fyrst og fremst á þeim fréttum sem hafa komið um hlutabréfaeign dómara í blöðunum. Svo hefur verið að koma í ljós að þeir hafa verið að staðfesta að þeir hafi tapað fjármunum í bankahruninu, sumir dómarar.“ Þær fréttir sem Sigurður vísar í voru meðal annars sagðar í desember 2016, þremur mánuðum eftir að endurupptöðubeiðni Sigurjóns var send inn.
Endurupptökunefnd féllst í maí 2019 á endurupptöku tveggja hæstaréttarmála þar sem Sigurjón var dæmdur til fangelsisrefsingar fyrir brot í starfi sínu. Annað þeirra mála var markaðsmisnotkunarmálið, en hitt Ímon-málið svokallaða.
Ein þeirra ástæðna sem gefin var fyrir þeirri niðurstöðu var að hæstaréttardómararnir Viðar Már Matthíasson og Eiríkur Tómasson sem dæmdu í málunum, hefði átt hluti í Landsbankanum fyrir hrun og orðið fyrir verulegu tjóni við fall bankans. Þeir eru nú báðir komnir á eftirlaun.
Umfjöllunin leiddi til þess að dómarar við Hæstarétt voru látnir birta hagsmunaskráningu sína opinberlega, og hefur það þegar verið gert á heimasíðu réttarins síðan þá.
Málin eru nú komin aftur á dagskrá Hæstaréttar og verður málflutningur í þeim er 4. og 11. mars.
Veistu meira? Láttu okkur vita
Það tókst ekki að sækja formið. Reyndu aftur eftir augnablik.
Ýttu á + við höfund, fréttamál eða greinaröð til að fylgja því og fá tölvupóst þegar eitthvað nýtt kemur, einn á dag í mesta lagi. Því sem þú fylgir stjórnarðu á Minni síðu.
hrun
Kevin Stanford og Karen Millen
Annað opið bréf til Ármanns Þorvaldssonar
Kevin Stanford og Karen Millen
Opið bréf til Ármanns Þorvaldssonar
Jón Baldvin Hannibalsson
Upp skalt á kjöl klífa
CLN-málinu áfrýjað til Landsréttar
Íslenska bankakerfið sagt dýrt, spillt og gráðugt
Athugasemdir