Tæpum þremur milljónum safnað í Málfrelsissjóð

Alls hafa 20 þús­und evrur, eða tæpar þrjár millj­ónir króna, safn­ast í Mál­frels­is­sjóð, en söfn­unin hófst 21. júní. Sjóð­ur­inn mun standa straum af málsvarn­ar­kostn­aði og mögu­legum skaða­bótum sem konur kunna að vera dæmdar til að greiða ef þær tjá sig um kyn­bundið ofbeldi.

Fjórar konur hafa efnt til söfn­unar á Karolina­fund fyrir Mál­frels­is­sjóð sem mun geta staðið undir málsvarn­ar­launum og skaða­bótum sem konur gætu þurft að greiða vegna ummæla um kyn­bundið ofbeldi.

[adspot]Konurnar sem standa fyrir söfn­un­inni eru þær Helga Þórey Jóns­dótt­ir, Anna Lotta Michaels­dótt­ir, Elísa­bet Ýr Atla­dóttir og Sóley Tóm­as­dóttir. Sóley segir í stöðu­færslu á Facebooksíðu sinni að 432 stuðn­ings­að­ilar hafi styrkt sjóð­inn.

Dómur Hildar og Oddnýjar fordæmisgefandi

[links]Í við­tali við Kjarnann í júní sagði Anna Lotta dóm­­inn gegn Odd­nýju Ara­dóttur og Hildi Lilli­endahl Vigg­ós­dótt­ur, sem dæmdar voru til að greiða miska­bætur vegna ummæla sinna í kjöl­far hins svo­kall­aða Hlíða­máls, væri for­dæm­is­gef­andi. Anna Lotta sagði að stofn­endur sjóðs­ins væru að berj­ast fyrir því að fá rétt­ar­kerf­inu breytt og að gefið væri að Oddný og Hildur myndu fá úr sjóðnum.

„Það er ekk­ert verið að dæma harðar eða oftar í kyn­ferð­is­brota­mál­um, en þá virð­ist með þessum dómi vera komið til­tölu­lega gott vopn gegn konum sem tjá sig um kyn­ferð­is­of­beldi, að það sé hægt að kæra þær fyrir meið­yrð­i,“ sagði Anna Lotta.